Халқымыз Ұлы жеңіске өлшеусіз үлес қосты
Қысқа сілтеме алу
Қазақстан президенті Қасым-Жомарт Тоқаев «Отан қорғаушылар» ескерткішіне гүл шоғын қою рәсіміне қатысты
НҰР-СҰЛТАН, 9 мамыр — Sputnik. Мемлекет басшысы Қасым-Жомарт Тоқаев қазақстандықтарды Жеңіс күнімен құттықтады.
«Баршамыз үшін бұл мерекенің маңызы ерекше. Халқымыз Ұлы жеңіске өлшеусіз үлес қосты. Отандастарымыз майдан даласында ерлікпен шайқасып, олардың жартысынан жуығы елге қайтып оралмады. Жауынгерлеріміздің батырлығы мен қайтпас қайсарлығы Жер бетінде бейбітшілік пен тыныштықты сақтауға мүмкіндік берді», — деді президент құттықтауында.
Ол тыл еңбеккерлерінің жанкештілігінің арқасында Қазақстан майдан даласына орасан зор көмек көрсеткенін, соғыс жылдары елімізге жүздеген зауыт пен фабрика көшірілгенін, майданға мыңдаған вагон киім-кешек пен азық-түлік жіберілгенін атап өтті.
«Аға буынның теңдессіз ерлігін құрметтеп, зұлмат соғыстың зардаптарын ұмытпау – біздің қастерлі борышымыз. Барлық ардагерлер мен тыл еңбеккерлеріне зор денсаулық, ұзақ ғұмыр тілеймін. Еліміз аман, жұртымыз тыныш болсын», — деді Тоқаев.
Мемлекет басшысы «Отан қорғаушылар» ескерткішіне гүл шоғын қойып, бір минуттық үнсіздікпен Ұлы Отан соғысында қаза тапқан жауынгерлер рухына тағзым етті.
Құрметті қарауыл ротасы салтанатты сап түзеп жүріп өткеннен кейін, Қасым-Жомарт Тоқаев рәсімге қатысқан соғыс және тыл ардагерлерін мерекемен құттықтады.
sputniknews.kz
