Грузия НАТО-ның маңызды серіктестерінің бірі

Грузия өзінің қарулы күштерін жаңарту мен демократияны нығайтуда жақсы жетістіктерге жетті, оның НАТО-мен серіктестігі «бәрімізді» қауіпсіз етеді, деп мәлімдеді Альянстың бас хатшысы Йенс Столтенберг Грузия премьер-министрі Георгий Гахариямен кездесуінде.

Грузия Солтүстік Атлантикалық Альянспен жақындасу үшін барлық мүмкіндіктерді пайдалануы керек, деді Брюссельде Грузия премьер-министрі Гахариямен кездесу кезінде НАТО-ның бас хатшысы Йенс Столтенберг. НАТО Грузияның реформалар саласындағы жетістіктерін құптайды, деді ол онлайн-баспасөз конференциясында.

«Біз бәріміз бірге істеп жатқан жұмысымызбен мақтан тұта аламыз, ал сіздер біздің жалпы қауіпсіздігімізге және біздің миссияларымыз бен операцияларымызға қосқан үлесіңізбен мақтана аласыздар», — деді ол Грузияның НАТО-ның Ауғанстандағы оқу миссиясына қатысуы туралы.

НАТО-ның Грузиямен серіктестігі «бәрімізді» қауіпсіз етеді, деп атап өтті Столтенберг. «Сіздің еліңіз қазірдің өзінде қарулы күштерін жаңарту мен демократияны нығайтуда жақсы жетістіктерге жетті. Мен сіздерді НАТО-мен жақындасу үшін барлық мүмкіндіктерді пайдалануды жалғастыруға шақырамын. Мүшелікке дайындалу. Біз келесі айда Грузиядағы сайлау ең жоғары халықаралық стандарттарға сай келеді деп күтеміз. Бұл Грузия үшін де, НАТО үшін де маңызды», — деп қосты Столтенберг.

Столтенбергтің айтуынша, Грузия мен НАТО 2020 жылы серіктестікті одан әрі нығайтуға келісті. «Бұл [келісім] әуе қозғалысының радиолокациялық мәліметтерімен алмасуды, гибридтік қатерлерді жою бойынша бірлесіп жұмыс жасауды және Қара теңіз аймағында бірлескен жаттығулар өткізуді қамтиды. НАТО Грузияның аумақтық тұтастығы мен егемендігін халықаралық деңгейде мойындалған шекараларында қолдайды. Біз Ресейді Абхазия мен Оңтүстік Осетия аймақтарын тануды тоқтатуға және өз күштерін шығаруға шақырамыз», — деді ол.

Twitter-де Столтенберг Грузия НАТО-ның маңызды серіктестерінің бірі екенін атап өтіп, Гахариямен кездесу фотосуретін жариялады.

2019 жылдың желтоқсанында Столтенберг Украина мен Грузия Альянсқа мүше болады деп мәлімдеді, бірақ қосылудың нақты мерзімін анықтауға әлі ерте.

Керімсал Жұбатқанов