Елордадағы жантүршігерлік апаттан кейін автобустарға кондукторларды қайтару талап етілуде — Қазақстан жаңалықтары

Қоғамдық көліктерге кондукторлар қайтарылсын! Осындай  мәлімдемелер қазір ғаламтор беттерінде қаптап кетті. Өйткені өткен аптада болған жол апаты жолаушылардың ашу ызасын туғызған секілді. Онымен қоса, бірнеше жыл бұрын автобустардың игілігіне берілген арнайы жолақтардағы жылдамдыққа шек қойылмақ. 

Елордадағы соңғы орын алған ірі жол көлік оқиғасына байланысты, қазір қаладағы қоғамдық көліктерде бұрынғы кондукторлар, яғни қазіргі кеңесшілерді автобусқа қайта әкелу жөнінде бастама көтеріліп жатыр екен. Өйткені қазіргі, жүргізушілер онсыз да ауыр мамандық иелері кондукторлардың жұмысын қоса атқарып жүр, деп хабарлайды «Еуразия бірінші» арнасы.

Соған байланысты қазір жолда неше түрлі апат жағдайлары көбейіпті. Ал, оған жолаушылардың пікірі қандай?      

«Кондуктор керек. Жүргізуші рульде отырғанда ойы бөлінеді. Ол адамдарға қызмет көрсете алмайды».

«Ал кондуктор керек. Ол терезеге қарайды ма немесе адамдарға қарай ма? Бір жағынан адамдарға қарау керек қой кондуктор. Ол адамдарға қараймын деп апат болады».

«Кондуктор керек. Автобус салонында түрлі жағдайлар болады. Үлкен кісілерге көмектесу қажет. Ол мамандардан көп нәрсе байланысты. Жауаптылар осы арқылы ақша үнемдеп қалуды көздеп отырған шығар. Біз Еуропа елі емеспіз, жолаушыларды қадағалау қажет».    

Ал таң сәріден түнге дейін жолдан көз алмайтын жүргізушілер де кондукторлардың өздеріне таптырмас көмекші екенін айтады. Өйткені халық нөпірі көп мезгілдерде жолаушылардың карталарының төлем жасағанын аңғарып үлгермейміз,  дейді. 

«Әр адам шопыр өз жұмысын, кондуктор өз жұмысын істеу керек. Көбінесе кейбір кезде жолды сұрайды, мазалайды. «Бір есікпен жұмыс істеңдер», — деп айтады. Өте қиын, адам көп. Кейбір кезде бір ақ маршрут қой қалалық. Сол кезде қиын бір есікпен істеген», — дейді автобус жүргізушісі Нұрлан Құлбалин.

Кондукторлардың азайғаны діттеген жеріне тегін жеткісі келетін пысықайларға да қол болып тұр екен.    

«Кондукторы жоқ автобустарға барсам, көп адамдар смс деп жүргізушіге кетіп қалады. Бірақ негізінде төлемейді. Тек стартқа қойып қояды, тексеру келсе төлейді. Ал тексеру келмесе сол бойы түсіп кетеді», — дейді кеңесші Зұлхамар Сейдахметов.

Ірі жол апаты болған кезде қарама-қарсы бағытта өтіп бара жатқан көлік жүргізушісі Бақдәулет сол сәт әлі күнге дейін көз алдымда тұр, — дейді. Тоқтап, өмірі қыл үстінде тұрған 30 жолаушыны құтқарып қалған ол, кондукторларды алып тастағалы жұмысымыз бірнеше есе қиындады деп отыр.  

«Артыма қараймын, салонда үлкен жолаушы жігіттер бар екен. Жігіттер жүріңіздер, артымыздағы автобусты құтқарайық, көмектесейік деп жаныма екі үш баланы ертіп алып кеттім. Бардым, бізде инструктаж бойынша бірінші тоқты өшіру керек. Массаны өшіруге келмеген соң, тоқты қолмен жұлуға тура келді. Қолыммен жұлдым, аккумулятордан ажыратқаннан кейін артқы есікті төртеуміз барып аштық», — дейді автобус жүргізушісі Бақдәулет Әлібек. 

Қаладағы жолаушылар тасымалына жауапты компания өкілдерінің айтуынша автобустар сараланған тариф жүйесіне көшкелі автопарктердің табысы бірнеше пайызға артқан. Сол себепті, сәтті жүзеге асқан жоба тоқтамайды. Керісінше, қыркүйек айына дейін кондукторларды толық алып тастаймыз деп отыр.

«Бірінші автопаркте кейбір бағыттарда автобустар лық толы. Сондықтан олар кондукторларды әлі шығарған жоқ. Неге? Біріншіден адам көп болған соң, екіншіден кейбір адамдар карточканы қалай басу керектігін білмейді. Жаңағы кондукторларды кеңесші ретінде қалдырып отырмыз. Бірақ, картаға 98-99 % көшсек, біз мүлдем кондукторларды да, кеңесшілерді де алып тастаймыз», — дейді  «Астана ЛРТ» ЖШС қоғаммен байланыс қызметінің жетекшісі Науат Азанбаева.

Демек, кеңесшілердің автобустағы күні санаулы. Бұлай деп ЛРТ мамандары айтып отыр. Сондықтан, жолаушыларға байбалам салмай, енгізіліп отырған өзгерістерге мойынсұнудан басқа амал жоқ секілді.