Елдегі заңсыз көші-қон схемаларының жолы кесілді: бірнеше қылмыстық топ ұсталды

Қазақстанның Ішкі істер министрлігі заңсыз көші-қон арналарының жолын кесуді жалғастыруда.

Министрліктің ұйымдасқан қылмысқа қарсы күрес департаментінің өкілі Қуаныш Алпыс ағымдағы айдың басынан бастап заңсыз көші-қонды ұйымдастыруға қатысы бар бірнеше қылмыстық топтың қызметі тоқтатылғанын мәлімдеді.

«Қылмыстық схемалар мемлекеттік шекараны заңсыз кесіп өту, шетелдіктерге уақытша тұруға рұқсат беру және еңбек қызметін жүзеге асыруға арналған рұқсаттарды жалған құжаттар арқылы рәсімдеуді қамтыды», – деді ол.

Атап айтқанда, Жамбыл облысында жергілікті тұрғын алыс шетел азаматтары үшін тау арқылы заңсыз көші-қон арнасын ұйымдастырғаны үшін ұсталды. Олар Еуропа Одағына жұмыс іздеп баруға тырысқан. Атырау облысында шетелдік үш азамат резидент еместерді жалған құжаттармен тіркеу қылмыстық схемасына қатысқаны үшін әшкереленді. Тінту шаралары кезінде олардың шетелдік паспорттары, «қара» бухгалтерия және құжаттар тәркіленді.

Ұқсас қылмыстық схема елордада анықталды, онда еңбек мигранттары үшін құжаттарды заңсыз рәсімдеумен айналысқан бес жергілікті тұрғын ұсталды.

«Барлық фактілер бойынша сотқа дейінгі тергеу жүргізілуде. Кінәлілерге жеті жылға дейін бас бостандығынан айыру және мүлкін тәркілеу жазасы қаупі төніп тұр. Бұл бағыттағы жұмыстар жалғасуда», – деп атап өтті Қуаныш Алпыс.