Елбасы жүктеген міндет жүйелі жұмыс пен сапалы бақылауды талап етеді

«Нұр Отан» партиясының Орталық аппаратында Елбасының Жолдауы мен Бес әлеуметтік бастаманың жүзеге асырылу барысына арналған жиын өтті. Онда қатысушылар аталған екі құжат бойынша атқарылған жұмыстарға тоқталып, шешуді қажет ететін кейбір мәселелерге назар аударды. Сондай-ақ іс-шарада партиялық бақылау жұмысының тиімді тетіктері де сөз болды.

Жиынға партия Төрағасының Бірінші орынбасары Мәулен Әшімбаев, Ұлттық экономика министрі Тимур Сүлейменов, Президенттің бес әлеуметтік бастамасының жүзеге асырылу барысын бақылау жөніндегі қоғамдық кеңестің төрағасы, Сенат депутаты Бақытжан Жұмағұлов, партияның Парламент Мәжілісіндегі фракциясының басшылығы, партиялық кураторлар және Мәжілістегі партия фракциясы жанындағы консультативті-кеңестік органдардың басшылары қатысты. Одан бөлек, бұл басқосуға бейнеконференц байланысы арқылы барлық өңірдің өкілдері де қосылды.
Отырысты ашқан Мәулен Әшімбаев Мемлекет басшысының 5 қазандағы Жолдауы еліміздің әлеуметтік жаңғыруы­ның негізін қалап, алдағы басым бағыттар­ды айқындап бергенін айтты. Сондай-ақ ол Елбасының жалақыны көтеріп, шағын және орта бизнесті дамыту арқылы халық­тың әл-ауқатын арттыратын кешенді шара­ларды анықтап бергеніне назар аударды.
Одан бөлек, Жолдауда білім беру мен денсаулық сақтаудың сапасын арттырудың жүйелі шаралары да айтылғаны белгілі. Халықтың өмір сүруіне жайлы орта қалыптастыруға да ерекше көңіл бөлінді. Осы мақсатта ауыз сумен қамту, қолжетімді баспана сияқты өзекті мәселелерді шешу жолдары қарастырылып, түрлі елдімекен­дерге арналған өңірлік стандарттар жүйесін әзірлеу бастамасы көтерілгенін де айта кеткен жөн.
Мемлекет басшысы Жолдау мен Президенттің бес әлеуметтік бастамасында көр­сетілген ауқымды әрі аса маңызды басым­дықтардың жүзеге асырылу барысы­на бақылау жүргізу ісін «Нұр Отан» партия­сына жүктегені белгілі. Осы мәселеге ерек­ше назар аударған партия Төрағасының Бірінші орынбасары алдағы уақытта бұл бағыттағы жұмыстың күшейетінін айтты.
– Партия Елбасы бастамаларының сапалы әрі уақытылы жүзеге асырылуы үшін бақылау жұмыстарын үш деңгей бойынша жүргізеді. Бірінші – республи­калық деңгейдегі бақылау жұмыстарына Мәжілістегі партия депутаттары жауапты. Сондай-ақ Жолдауды жүзеге асырудың жалпыұлттық жоспарына сәйкес партиялық кураторлардың және партия мен фракция жанындағы кеңес басшыларының да мін­деттері анықталды. Екінші – аймақтық деңгей бойынша партияның мәслихаттағы депу­тат­тары, жергілікті партия­лық кураторлар және «Нұрлы жол», «Нұрлы жер» бағдарламаларын бақылау жөніндегі комиссиялар белсенділік танытуы тиіс. Ал үшінші – ауыл-аймақ деңгейіндегі бақылау жұмыстарына бастауыш партия ұйымдарын жұмылдыруымыз керек, – деді Мәулен Әшімбаев.
Бүгінде партияның еліміз бойынша 6 мыңнан астам бастауыш партия ұйымы бар. Таяуда Астанада өткен бастауыш партия ұйымдарының республикалық форумында осы мәселе кеңінен талқы­ланған болатын. Сол кезде ұйым өкілдері партия жұмыстарына өз үлестерін қосуға дайын екендерін жеткізді.
Осылайша Елбасы тапсырмасының орындалу барысы партия тарапынан кешенді түрде бақылауға алынбақ. Бүгінде аталған бағытта қажетті шаралар қолға алынып, тиісті жұмыстар басталып кетті.
Сонымен қатар «Нұр Отан» партиясы Төрағасының Бірінші орынбасары Бес әлеуметтік бастаманың жүзеге асырылу барысындағы кейбір мәселелерге ерекше тоқталып өтті. Алдымен ол осы бастамалар аясында шағын несие беру ісіндегі олқылықтарға назар аударды. Оның айтуынша, бүгінге дейін 13 мыңнан астам азамат шағын несие алып, жоспардың 98 пайызы орындалған. Соның нәтижесінде 52 млрд теңге игерілген екен.
– Бұл жаман көрсеткіш емес. Дегенмен нәтижелерді сараптап қарайтын болсақ, күрмеуі қиын мәселелердің де бар екенін көреміз. Мысалы, шағын несие беру баста­масы ауылдық жерлерде нәтижелі жүзеге асырылып жатыр. Ал қалалық жерлердегі көрсеткіш көңіл көншітпейді. Бүгінде қалалық жерлер үшін жоспарланған 3 мың адамнан тек 1 мың азаматқа ғана шағын несие берілген, – деді Мәулен Әшімбаев.
Тарқатып айтар болсақ, аталған көрсет­кіш бойынша көш соңында Атырау облысы тұр. Мұнайлы өлкеде қала тұрғындарының ішінен бар болғаны 13 азаматқа ғана шағын несие берілген. Бұл жоспарлы меженің 23,65 пайызын құрайды. Сол сияқты Павлодар, Солтүстік Қазақстан, Қызы­л­орда облыстары мен Астана қаласында да жағдай мәз емес. Нәтижесінде еліміз бойынша қалалық жерлер үшін шағын несиеге бөлінген 20,2 млрд теңгенің 62 пайызы ғана игерілгені белгілі болып отыр.
Желтоқсан айының басындағы жағдай бойынша игерілмеген қаражаттың көлемі 7,7 млрд теңгені құрап отыр. Оның 26 пайызы «Даму» қорына тиесілі болса, қалған 74 пайызы екінші деңгейлі банктердің есепшотында жатыр. Осы ретте екінші деңгейлі банктер аталған мақсатта өздеріне бөлінген қаражаттың 42 пайызын ғана игергенін атап өткен жөн.
Сондай-ақ Мәулен Әшімбаев
«7 – 20 – 25» бағдарламасы бойынша да атқарылған жұмыстарға назар аударды. Оның сөзіне қарағанда, 6 желтоқсанға дейінгі дерек бойынша бағдарламаға қатысу үшін 5 мыңнан астам өтінім келіп түскен. Соның ішінде жалпы сомасы
40 млрд теңгені құрайтын 3,5 мыңға жуық өтінім мақұлданған. Әйтсе де, бұл бастама бойынша да өңірлердегі жағдай әркелкі. Мәселен кейбір аймақтарда жергілікті атқарушы орган тарапынан арнайы санаттағы азаматтарға бастапқы жарна үшін субсидия бөлу жұмыстары ойдағыдай жүргізілмеуде.
– Бұл ретте біз аталған субсидияның барлық азаматқа бірдей беріле бермейтінін халыққа түсіндіруіміз керек. Осы мәселеде барлық облыс жүйелі әрі кешенді жұмыс істеуі тиіс. Бұл іске партия филиалдары мен біздің депутаттарымыз да белсенді қатысып, Елбасы берген тапсырманың сапалы орындалуын қамтамасыз етуге міндетті, – деді «Нұр Отан» партиясы Төрағасының Бірінші орынбасары.
Бұдан басқа, «7 – 20 – 25» бағдарламасы бойынша жаңадан салынған үйлердің жетіспеуі және кей аймақтардағы ақ­параттық-түсіндіру жұмыстарының әл­сіздігі сияқты мәселелер де айтылды. Одан бөлек, тұрғын-үй коммуналды шаруа­шылық мәселесінде де олқы тұстардың бар екені сөз болды.
Мәулен Әшімбаев осындай өзекті мәселелер бола тұра, партия филиалдары мен партиялық кураторлардың үнсіз отырғанын сынға алды.
– Біздің барлық облыс пен ауданда фи­лиалдарымыз бар. Барлық өңірде пар­тиялық кураторларымыз бен өңірлік Қоғамдық кеңестер жұмыс істейді. Ендеше неге олар осы мәселелерді әкімдіктердің алдында көтермейді? Әрине, бұл жерде жүйелі мәселелердің де бар екенін білеміз. Мәселен, кейбір азаматтардың несие тарихына байланысты олардың несие алу мүмкіндіктері төмен екені белгілі. Соған қарамастан біз бұл мәселелерді шағын несие берумен тікелей айналысатын «Даму» қорының және үйлестіруші орган Ұлттық экономика министрлігінің алдына мәселе етіп қойып, тиісті шешім қабыл­дауға тиіспіз. Қажет болса, заңнамаларға түзетулер енгізуге де бастамашыл болуымыз керек. Ең бастысы, шағын несие беруді қалалық жерлерде табысты жүзеге асырып, Елбасы тапсырмасын орындау үшін жүйелі шараларды қолға алуымыз қажет, – деді Мәулен Әшімбаев.
Өз кезегінде «Президенттің бес әлеу­меттік бастамасының» жүзеге асырылу бары­сын бақылау жөніндегі қоғамдық кеңестің төрағасы, сенатор Бақытжан Жұмағұлов атқарылған жұмыстар жөнінде баяндап берді. Сондай-ақ ол бақылау жұмыстарын одан ары жетілдіру үшін бірқатар басымдықтарды атап өтті.
– Алдымен, кей облыстардың жекелеген бағыттарды жүзеге асырудағы озық тәжірибелерін өзге өңірлерге үйретуіміз керек. Облыстар бес әлеуметтік бастаманы іске асыруда бір-бірімен тәжірибе алмасып, тығыз байланыс орнатуы тиіс. Одан бөлек, бағдарламалардың, соның ішінде,
«7 – 20 – 25» пен шағын несиелендіру бағ­дар­ламаларының қатысушыларына ба­ғытталған ақпараттық жұмыстарды жүйелі түрде жандандыру керек. Жатақханалар құрылысы бойынша кеңес жер телімдерін уақытында рәсімдеу, инвесторларды тарту сияқты жұмыстарда жоғары оқу орын­дарының ректорларына көмек көрсету үшін облыс әкімдерінің орынбасарларын жауапты етіп бекітуді ұсынды. Ең бастысы, Үкімет, Парламент, банктер және жергілікті атқарушы органдар арасындағы өзара іс-әрекетті одан ары жетілдіруіміз қажет, – деді Бақытжан Жұмағұлов.
Айта кетейік, аталған кеңес мамыр айында Мемлекет басшысының тапсыр­масы бойынша құрылған болатын. Оның құрамына еліміздегі жетекші саяси пар­тиялар мен үкіметтік емес ұйым өкілдері, Қазақстан халқы Ассамблеясының мүшелері, белгілі қоғам қайраткерлері, белсенді азаматтар және сарапшы мамандар енді. Осы уақыт аралығында Кеңес мүшелері бірқатар отырыс өткізіп, еліміздің барлық өңірінде атқарылып жатқан жұмыстармен танысты.
Сонымен бірге, Ұлттық экономика ми­нистрі Тимур Сүлейменов пен Мәжі­ліс­тегі партия фракциясы басшысының орын­ба­сары Асқар Базарбаев сөз алып, өз тара­пынан істелген жұмыстарға тоқталып өтті.
Іс-шара соңында «Нұр Отан» партиясы Төрағасының Бірінші орынбасары Елбасы тапсырмасын орындау үшін тиянақты жұмыс істеп, сапалы бақылау жүргізуді қамтамасыз ететін бірқатар міндеттерді анықтап берді. Атап айтқанда, Мәулен Әшімбаев Мәжілістегі партия Фракция­сының депутаттарына, партиялық кура­торларға, партия жанындағы кеңес басшы­ларына, аймақтық және аумақтық партия филиалдарына және партия хатшылары мен Орталық аппарат қызметкерлеріне Мемлекет басшысы жүктеген міндетті абыроймен атқару үшін нақты тапсырмалар берді.

Еламан ҚОҢЫР