Денсаулық сақтау басқармасы: Коронавирус жұқтырғандардың жағдайы жақсарып келеді — Қазақстан жаңалықтары

Алматыда коронавирус жұқтырған үш науқастың жайы белгілі болды, деп хабарлайды Stan.kz ақпарат агенттігі.

Бұл туралы Алматы қалалық қоғамдық денсаулықты сақтау басқармасының басшысы Тілеухан Әбілдаев айтты.

«Алматыда тағы 3 адам коронавирус жұқтырғаны анықталды. Қазір жұқпалы аурулар ауруханасында КВИ расталған 22 пациент бар. Бүгін жатқызылған 3 адамның бірі – әйел адам шетелден келген азаматтармен байланыста болған. Құрғақ жөтел, тамақ қырылдауы, кеуде ауырып, құлақтың бітелуі сияқты симптомдар болған соң одан 18 наурызда тест алынған болатын. Бүгін тест нәтижесі расталды. Екінші пациент — Берлин-Алматы чартерлік рейсінің бортсерігі. 12 наурыздан ұшып келген күннен бастап жұқпалы аурулар ауруханасында карантинде болды. Үшінші пациент — 1997 жылы туған ер адам 19 наурызда Париж-Минск-Алматы рейсімен ұшып келген. Қазір тест көрсеткіші расталған соң ол провизорлық клиникадан қалалық жұқпалы аурулар ауруханасына ауыстырылды», — деді Т.Әбілдаев. 

Сөзінше, қазір 20 науқастың жағдайы тұрақты.

«Олардың барлығының денсаулығы жақсара бастаған. Дене қызуы түсті. 2 адамның жағдайы орташа ауыр деп бағаланып отыр», — деді ол.

Сондай-ақ Бүгінде қаланың провизорлық емханаларында 696 адам жатыр. Үй карантинінде 1108 адам оқшауланған.