«Бір ғана кемшілігі — Тасқын мен Розаның баласы болғаны»: Қалдыбек Құрманәлі Әли Оқапов туралы ойын айтты

Отандық танымал сазгер Қалдыбек Құрманәлі өнердегі жас буын жайлы сөз қозғап, Роза Рымбаеваның ұлы Әли Оқапов жайлы не ойлайтынын айтты, деп жазады Kznews.kz KAZ.NUR.KZ сайтына сілтеме жасап.

Қалдыбек Құрманәлі Әли Оқаповқа қатысты даулы жағдайға пікір білдірді. Сазгер Роза Рымбаеваның ұлы «Құрмет» орденінен гөрі «Қазақстанның еңбек сіңірген қайраткері» атағына лайық деп есептейді. Алайда ол Оқаповтың бір кемшілігі бар екенін жеткізді.

«Енді Роза Рымбаеваның баласы туралы айтайын. Ол таза кәсіби музыкант. Жастар арасында беделі күшті жігіт. «Құрмет» орденінен гөрі «Қазақстанның еңбек сіңірген қайраткеріне» лайық адам. Туғанынан бастап, музыкамен ғана айналысып келе жатыр. Қай жерде музыкалық білім бар, бәрін оқып тауысқан адам. Өнердің майын ішкен. Бір ғана кемшілігі – Тасқын Оқапов пен Роза Рымбаеваның баласы. Атақты адам болу қиын емес. Атақты адамның баласы болу – ең қиыны. Роза Рымбаева «Халық әртісі» атағын 29 жасында алған. Ал баласы қазір 31 жаста. Өнер адамы ретінде айтарым, Әли – кәсіби музыкант. Оған «Құрмет» ордені керек жоқ еді. Билік ұсынды, ол бас тартқан жоқ. Оның түбіне жеткен – қазақтың көреалмаушылығы. Мен Әлиді талантты әрі кәсіби музыкант ретінде мойындаймын», – деді композитор «Сұрауы бар» бағдарламасында.