Бердіқұлов байқауында бағы жанған журналистер кім?

0

Қазақстан Республикасы Мәдениет және спорт министрлігінде Қазақстанның БАҚ журналистері арасында спорт журналисі, публицист және қоғам қайраткері Сейдахмет Бердіқұлов атындағы жыл сайын өтетін байқау қорытындыланды.

Дәстүрлі түрде ұйымдастырылып келе жатқан байқауға биыл еліміздің әр өңірінен газет және сайт беттерінде жарық көрген 167 мақала, 11 телевизиялық материал, 3 деректі фильм мен 2 кітап келіп түсті.
Қазылар алқасының шешімімен жылына бір рет үш жеңімпазға тапсырылатын сыйлыққа «Қазақ спорты» газетінің тілшісі Мәдина Асылбек, «Қармақшы таңы» газетінің журналисі Нұрбай Жанәділов және «Qazsport» арнасының тілшісі Ермек Төрениязов лайықты деп танылды. Спорт журналистерінің үздігін анықтау Қыдырбек Рысбек, Дүрәлі Дүйсебай, Аман Сейтканов және Нұрғазы Сасаев секілді журналистика саласының майталмандарына тапсырылды.
Жеңімпаздар «Сейдахмет Бердіқұлов атындағы сыйлықтың лауреаты» арнайы төсбелгісімен марапатталып, диплом мен ақшалай сыйлыққа ие болады.

А. Ахметқазы

Дереккөз: Айқын