Бас прокуратура «заңсыз митингіге шыққан» 950-ден аса адамның жазаланғанын хабарлады
Нұр-Сұлтан мен Алматыда «рұқсат етілмеген митингіге» қатысқаны үшін 957 адам әкімшілік жауапқа тартылған. Оның 670-і 6-15 тәулікке қамалып, 115-іне айыппұл салынған. Бұл туралы 13 маусымда орталық коммуникациялар қызметінде өткен брифинг кезінде Бас прокуратураның қоғамдық мүддені қорғау қызметінің басшысы Сапарбек Нұрпейісов хабарлады.
Оның сөзінше, әрекетіне өкінуіне, отбасылық жағдайына байланысты не басқа да себеппен 311 адамның қамау мерзімін қысқарту бойынша сотқа апелляция түскен.
«Сот мақұлдап, олар босап шықты. Бүгін тағы 63 адам шығады. Уақытша абақтыда 180 адам жазасын ары қарай өтей береді. Олар 6-15 тәулікке кесілген» деді Нұрпейісов.
Қазақстанда билік рұқсат етпеген митингілер президент сайлау өткен 9 маусымда және 10-11 маусым күндері өткен. Наразылар президент сайлауының ресми қорытындысына қарсылық білдіріп, кейбірі қамауға алынғандарды босатуды талап еткен. 12 маусымда Қазақстанның бірнеше қаласында қауіпсіздік күшейіп, интернет бұғатталған.
Президент сайлауында жеңімпаз танылып, 12 маусымда қызметіне кіріскен президент Қасым-Жомарт Тоқаев полицияның наразыларды ұстауы «міндетті шара» деп атаған. Қазақстанның ішкі істер министрлігі наразылық акциясына қатысушыларды «арандатушылар» деп сипаттайды. Бас прокуратура «заңбұзушылықтарға одан әрі тосқауыл қоюға» уәде еткен.
Видео: Алматы полициясы наразыларды қалай ұстады?
Бұған дейін Қазақстанның ішкі істер министрлігі 9-10 маусым күндері 700-ге жуық адам ұсталғанын хабарлаған. Құқық қорғаушылар билік ұсталғандар санын «тым азайтып көрсетті», ұсталғандардың әкімшілік жауапқа тартылғаны және қай жерде қамауда отырғаны туралы туыстарына хабарламады деп мәлімдеді. Министрлік Нұр-Сұлтанда ұсталған 200-ге жуық азамат өзге елді мекендерге жеткізілгенін хабарлаған.
12 маусымда Біріккен Ұлттар ұйымының адам құқықтары жөніндегі басқармасы «бейбіт наразыларды жаппай ұстау – Қазақстанның адам құқығы бойынша алған міндеттемелеріне айқын қайшылық» деген. Ұйым Қазақстанды азаматтардың бейбіт жиын өткізу мен пікір айту еркіндігін сақтауға, азаматтарға конструктивті түрде саяси өмірге араласуға мүмкіндік беруге шақырған.
