Балалардың гаджетті пайдалану уақыты қандай – Мамандар жауап берді

0
13

Денсаулық сақтау министрлігі оқушылардың гаджеттерді қолдану нормасын анықтады, деп хабарлайды Kznews.kz ақпарат агенттігі 31 арнаның Информбюро жаңалықтар бағдарламасына сілтеме жасап.

Балалар  телефонды 15 минуттан көп қарамауы керек. Өйткені компьютерлер мен телефондар көру қабілетін бұзады. Бірақ ата-аналар бұл нормаларды сақтау мүмкін емес дейді.

Денсаулық сақтау министрлігі әр түрлі жастағы оқушылардың электронды құрылғыларды қанша уақыт қолдану керек екенін анықтады.

Бірінші сынып оқушылары үшін компьютер алдында үздіксіз сабақ оқу ұзақтығы  – 15 минут, 2-3 сынып оқушылары үшін — 20 минуттан аспауы керек. 4-8 сынып оқушылары электронды құрылғылармен 25 минут үздіксіз отыра алады. Ересектерге компьютерді отыз минут қолдануға рұқсат етіледі.

“Сабақ 45 минутқа созылған жағдайда қалған бөлігі теориялық бөлікпен толтырылуы керек немесе арасында үзіліс болуы тиіс”, – дейді ҚР ДСМ КСЭК тамақтану, білім беру және тәрбие объектілерін санитарлық-гигиеналық бақылау және қадағалау басқармасының бас сарапшысы Индира Басманова

Ата-аналардың айтуынша, бұл нормаларды тек мектепте сақтауға болады. Алайда қашықтан оқу барысында норма сақталмайды. Дәрігерлер гаджеттерду ұзақ уақыт үздіксіз пайдалану көру қабілетіне зиян тигізеді дейді. Бұрын мектептерде диагноз қою кезінде балалардың тек бес пайызында көру қабілеті нашар еді, қазір ол он пайызға дейін жетеді. Мектеп оқушыларының көпшілігі құрғақ көз синдромына тап болады.

“Құрғақ көз синдромы дегеніміз – көздің жарыққа тітіркеніп, қышуы, фотофобиямен сипатталатын созылмалы ауру. Емдеу үшін көз тамшылар тағайындалады”, – дейді көз дәрігері Амина Әлиева.

Сарапшылардың айтуынша, монитор  алдында ұзақ отыру миопия, яғни алыстан көру қабілетінің төмендеуіне әкеледі. Бірақ, әрине, гаджеттерден бас тарту мүмкін емес. Сондықтан балаға бірнеше ережелерді үйрету керек. Әр жиырма минут сайын үзіліс жариялап, жаттығуларды жасап тұру қажет. Сондай-ақ, құрылғыны көзге тым жақын ұстамай, 50 сантиметр қашықтықты сақтаған абзал. Көздің жиі жыпылықтатуды ұмытпаған жөн.