Байқоңырдан үш ғарышкері бар «Союз» кемесі ұшырылды

0

Қазақстанның Қызылорда облысындағы Байқоңыр айлағынан 20 шілдеде «Союз» кемесі ұшырылды. Кемеде ресейлік ғарышкер Александр Скворцов, Еуропа ғарыш агенттігінің астронавты Лука Пармитано, NASA астронавты Эндрю Морган болған. Жаңа экипаж мүшелері халықаралық ғарыш станциясында бірқатар тәжірибелер жүргізеді. Ресейлік ақпарат агенттіктерінің жазуынша, зерттеу тобы қараша айында ашық ғарыш кеңістігіне шығады. Халықаралық ғарыш станциясына бірнеше ай бұрын ресейлік Алексей Овчинин және америкалық ғарышкер Ник Хейг аттанған еді. Онда NASA ғалымы Кристина Кук та бар.

«Союз МС-13» кемесі орналасқан «Союз-ФГ» зымыран тасығышы Нұр-Сұлтан уақытымен сағат 22.48-де ұшырылды. Зымыран тасығыш әуеге көтерілген соң бірқатар аймақ тұрғындары аспаннан жап-жарық дене байқағанын жазды.

20 шілдеде адамзаттың ең алғаш рет Айға аяқ басқанына 50 жыл толды. 1969 жылы дәл осы күні бортында командирі Нил Армстронг және ұшқыш Баз Олдрин болған америкалық «Аполлон-11» кемесі Айдың оңтүстік-батысындағы Тыныштық теңізіне қонды. Олар Айдың үстінде 21 сағат 36 минут 21 секунд болған. Осы уақыт бойы оларды командалық модуль ұшқышы Майкл Коллинз Ай орбитасы маңында күтіп отырды. Нил Армстронг Айдың топырағын ең алғаш рет басқан адам ретінде тарихта қалды.

Azattyq

Загрузка...

ПІКІР ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз