Автокөліктерді заңсыз рәсімдеу: кәсіпкер Болатов әділдік талап етеді
Жеке кәсіпкер Азат Болатов Қазақстанның оңтүстігінде автокөліктерді заңсыз қайта рәсімдеу фактілерін анықтап, ел басшылығынан әділдік орнатуға көмектесуін сұрады деп хабарлайды Kznews.kz тілшісі КазТАГ агенттігіне сілтеме жасап.
2024 жылдың маусым айында Азат Болатов алаяқтардың құрбанына айналған. Оның сегіз көлігі алдау арқылы иеленіліп, заңсыз рәсімделген. Кәсіпкердің айтуынша, бұл жағдай құқық қорғау органдарының қатысуынсыз жүзеге асуы мүмкін емес.
«Сегіз көліктің екеуін өзім тауып алдым. Бірі жалған нөмірмен жүрген болса, екіншісінің VIN-коды өзгертіліп, Шымкент қаласындағы автоЦОН-да заңсыз тіркелген. Бұл қылмыстар күштік құрылымдардың кейбір қызметкерлерінің қолдауынсыз іске аспайды деп ойлаймын», – деді Болатов.
Қазіргі уақытта іс Жамбыл облысы полиция департаментінде тергелуде. Бірақ кәсіпкер тергеу барысына қанағаттанбайды.
«Бұл адамдар полицияның шақыртуларына қарамастан, әлі күнге дейін бостандықта жүр. Менің қолымда дәлелдер, жауап алу хаттамалары бар, бірақ оларға ешқандай шара қолданылмай отыр», – деп шағымданды ол.
Азат Болатов Қазақстан Президенті Қасым-Жомарт Тоқаевқа, Премьер-министр Олжас Бектеновке, Бас прокурор Берік Асыловқа және Ішкі істер министрі Ержан Сәденовке ашық түрде өтініш білдірді.
Құқықтық қорғауды талап етеді
Кәсіпкердің сөзінше, бұл жағдай оның қаржылық жағдайына ауыр соққы болды.
«Көліктер үшін алынған несиелер әлі күнге дейін төленіп жатыр. Банктер оларды тоқтата алмайды. Қиындықтың кесірінен мен отбасыммен тұрған жалғыз баспанамды сатуға мәжбүр болдым. Қарт ата-анам мен екі жас балам бар отбасымның жалғыз асыраушысы менмін», – деді ол.
Кәсіпкер ел басшылығынан бұл істі жеке бақылауға алуды және қылмыстық топтың басқа азаматтарға қауіп төндіруіне жол бермеуді сұрайды. Сонымен қатар, Премьер-министрдің автокөліктерді тіркеу кезінде көлеңкелі схемаларды жою тапсырмасына сәйкес, бұл жағдайды ерекше бақылауға алу қажеттігін атап өтті.
«Әділдікті орнату ғана емес, мұндай әрекеттердің қайталануына жол бермеу маңызды», – деп сөзін аяқтады Болатов.
