Ауғанстанда шабуылдан ондаған адам қаза тапты

Ауғанстанда «Талибан» қозғалысының содырлары әскери жаттығу лагеріне шабуыл жасап, кем дегенде 126 адам қаза тапты. Бұл туралы Reuters агенттігі Ауғанстан қорғаныс министрлігінің жоғары шенді шенеунігіне сілтеме жасап хабарлады. Ал ресми ақпарат бойынша, шабуылдан кем дегенде 12 адам қаза тапқан.

«Талибан» өкілінің мәлімдеуінше, шабуылдан 190 ауған сарбазы қаза тапқан. 100-ден астам адам қаза тапқаны туралы мәліметті агенттікке жергілікті билік өкілі растады. Алайда, үкімет өкілі түсінік беруден бас тартты. Агенттік әскерилердің беделін түсірмеу үшін жергілікті шенеуніктерге БАҚ-қа шабуыл туралы айтуға тыйым салынғанын хабарлады.

Шабуыл 21 қаңтар күні Вардак уәлаятының әкімшілік орталығы Майданшахр қаласында болды. Жанкешті әскери базада көлігін жарып, артынша «Талибанның» үш содыры кешен қызметкерлеріне оқ жаудырған. Сол күні «Талибан» өкілдері Катарда АҚШ-тың Ауғанстандағы бітім бойынша арнайы өкілі Залмай Халилзадпен кездесіп жатқан.

«Талибан» қозғалысы Ауғанстанда 1996-2001 жылдары билік құрған. 2001 жылы оны халықаралық коалиция әскері биліктен тайдырғанымен, түпкілікті күйрете алмады. Ауғанстандағы жағдай соңғы жылдары шиеленісіп кеткен. Елде радикалды исламшылдар жиі теракт жасайды.

BBC-дің зерттеуінше, «Талибан» Ауғанстанның 70 пайызында белсенді әрекет етеді. Қозғалыс өкілдері АҚШ пен НАТО Ауғанстаннан шықса елдегі билікті қайта қолына алатынына сенімді. Ауғанстанның заңды билігі мен АҚШ сол себепті «Талибан» өкілдерін бейбіт келіссөзге қосуға дайын.

2018 жылы қазанда Мәскеуде кездесуде тәліптер делегациясының басшысы мохаммад аббас Станакзай «Талибан» бейбітшілік туралы АҚШ-пен ғана келіссөз жүргізетінін мәлімдеген. Қозғалыс Ауғанстаннан халықаралық коалиция күштерін шығаруды талап етеді және іс басындағы үкіметті заңды билік деп санамайды.