Атырауда облыстық аурухана карантинге жабылды

0

Аурухана дәрігерлеріне қаралуға келген пациенттің коронавирусқа тапсырған тесті оң нәтиже көрсеткен

НҰР-СҰЛТАН, 1 сәуір – Sputnik. Атырау қаласындағы облыстық аурухана екі күнге карантинге жабылды, деп хабарлайды коронавируспен күрес жөніндегі жедел штаб.

Індетке шалдыққан науқас – Қызылқоға ауданының 28 жастағы тұрғыны.

Өткір респираторлық вирустық инфекция белгілерімен Атыраудағы облыстық ауруханаға жүгінген.

«Одан алынған тест әйелдің коронавирусқа шалдыққанын көрсетті. Қазір  науқаспен араласқан адамдардың тізімі жасалуда. Осыдан кейін  Атырау облыстық денсаулық сақтау басқармасының шешімімен, облыстық аурухана екі күнге карантинге жабылды. Медициналық мекемеде дезинфекция жүргізіліп, пациентпен байланыста болған дәрігерлер мен науқастар оқшауланған», -делінген хабарламада.

Белгілі болғандай, әйел 27 наурызда «Ыстамбұл-Атырау» арнайы рейсімен келген.

Тағы оқыңыз: Қазақстандық дәрігер кімдердің коронавирус жұқтыру қаупі жоғары екенін айтты

Бұдан бөлек, дәл осы рейспен вирус жұқтырған 20 жастағы жігіт те ұшып келді.

Соңғы деректер бойынша, Атырау облысында коронавирус жұқтырғандар саны 16 адамға жетті. Барлық пациент инфекциялық стационарда емделіп жатыр. Олармен байланыста болған адамдар анықталып, карантинге жатқызылуда.

Қазақстанда 369 адам індетке шалдықты. 26 адам дертінен айықса, үш науқас қайтыс болды.



sputniknews.kz