Астанада отбасын құратындардың орташа жасы белгілі болды

Астанада отбасын құрған жұптардың саны көбейді. Бұл туралы Астана әкімінің баспасөз қызметі хабарлады.

Астанадағы азаматтардың хал актілерін тіркеу орындарының статистикасына қарағанда 2018 жылы 10 194 жұптың некесі тіркелген. Астана әкімдігі былтыр осындай кезеңде қанша неке тіркелгенін нақтылаған жоқ.

Мамандардың мәліметінше, соңғы жылдары Астанада шаңырақ құратындардың орташа жасы ұлғайып келеді. Қалыңдықтың орташа жасы – 25, некелесуші ерлердің орташа жасы – 35.

Биыл Астана тұрғындары арасында тіркелген ең егде некелесушілер – 55 жастағы әйел мен 80 жастағы ер адам. Еске сала кетейік, бұған дейін 2018 жылы Қазақстандағы ең егде некелесушілер Батыс Қазақстан облысында тіркелгені хабарланған еді.