Ақтөбе облысында екі жүкті келіншек перзентханаға трактормен келген

Боранға байланысты жол жабылса да толғатып жатқан екі келіншек 150 шақырым жерден аудандық ауруханаға әкелінді, деп хабарлайды Aktobenews.kz.

Кеше, 19 ақпан күні Байғанин аудандық ауруханасына толғатып жатқан екі келіншек түсті. Олар аудан орталығы Қарауылкелдіден 150 шақырым жерде орналасқан Жарқамыс ауылынан трактормен келген.

Аудандық аурухана бас дәрігерінің орынбасары Серік Әділхановтың сөзінше,​ боранды күні ауылдық елдімекендердің науқастары ауруханаға өздері келуге мәжбүр. Себебі боранды күндері аурухананың көлігін жіберу өте қауіпті.

«Бізге трактормен де, атпен де, қайықпен де келеді. Мәселен, көктем кезінде су тасып жатқанда акушер әйел жүкті келіншекті қайықпен әкелген. Бірақ ауылда дұрыс қайық жоқ қой. Сөйтіп, «төтенше жағдай қызметкерлері қайықтағы екеуін құтқарып алды» деп орденге ие болады. Ал жүкті келіншекті ауруханаға әкелген байғұс акушердің үсті су-су. Сонда оған ешқандай орден де берілген жоқ. Дәрігерлер атақ алуға емес, науқастың өмірін сақтап қалуға жүгіреді», — дейді Серік Әділханов.

Telegram арнасындағы маңызды жаңалықтар «zakon.kz». Жазылу!