АҚШ-та Bloomberg басшыларының бірі отбасымен бірге үйінде өлі табылды
Олардың 9 жастағы қызы да көз жұмған
АҚШ-тың Оңтүстік Каролина штатында Bloomberg LP компаниясының капиталды басқару бөлімінің менеджері Ричард Самарел, оның жұбайы Лина және 9 жастағы қызы өз үйлерінде өлі күйінде табылды, деп хабарлайды Azattyq Rýhy.
Трагедия Грир қаласындағы Самарел отбасы тұратын үлкен коттеджде болған. 54 жастағы Ричард, 45 жастағы Лина және олардың қызының денелерін полиция көршінің шағымынан кейін тапты. Көрші Ричардтың ұзақ уақыт бойы байланысқа шықпағанын айтып, алаңдаған.
Nypost.com хабарлағандай, Ричард пен Лина 2009 жылы үйленген. Лина АҚШ-тың ардагерлер істері жөніндегі департаментінде жұмыс істеген. Олардың екі үлкен баласы бар, олар оқиға кезінде мектепте болған.
Самарелдер отбасы шамамен 800 мың доллар тұратын 6 бөлмелі коттеджде тұрған.
Құқық қорғау органдары олардың өліміне не себеп болғанын әлі хабарлаған жоқ. Тергеу кісі өлтіру нұсқасын да, қайғылы оқиға болуы мүмкін деген болжамды да қарастырып жатыр.
