Әлтаев Әбіләзовқа: Парижде отырып елді митингке шақырудың қажеті жоқ

0

Тіркелмеген «Ел тірегі» партиясының жетекшісі Нұржан Әлтаев шетелде жүргенде қазақстандықтарды митингіге шығуға үгіттеп жүрген оппозиционерлерді сынға алды, деп хабарлайды Ulysmedia.kz.

Әлтаевтың сөзіне қарағанда, жаппай тәртіпсіздіктер мен көшедегі шерулерге шақырудың бәрі алдағы сайлауға дайындықтан туындаған.

«Биылғы қаңтардағы оқиға стихиялық көтерілістердің қанды зардаптарын көрсетті. Одан кейін жазықсыз адамдар, соның ішінде балалар зардап шекті. Әлі күнге дейін қылмыскерлер анықталмады, тергеу жүріп жатыр, адамдарды тірілту мүмкін емес», — деп жазды ол әлеуметтік желідегі парақшасында.

Әлтаев осындай жайттардан сабақ алуымыз керек деп есептейді.

«Қаңтардағыдай өрімдей жастарды атуға болатынын біле тұра, шетелде Париждің бір жеріндегі жылы әрі жайлы қонақүйде отырып, жастарды алаңдарға, көшелерге шақыруды мүлдем жауапсыздық деп санаймын. Оппозиция арасында ұзақ жылдар бойы шетелде отырып, басқаларды көше шеруіне айдап салып жүргендер де бар. Алаңдарда, көшелерде наразылық акцияларын ұйымдастыру керек деп біреу ойласа, осында келіп, халықпен иық тіресіп, бірге қиындықта болғаны жөн. Сонымен қатар, өз әрекеттеріңіз бен қоңырауларыңыз үшін жауапкершілікті алудан қорықпаңыз. Барлығымен бірге кеудеңізді оққа бірге төсеп көріңіз, түрмеге түсіңіз және елде болып жатқан барлық процестерге қатысыңыз», — дейді ол.

Нұржан Әлтаев оппозиция тек айғайлап, полициямен төбелесіп қана қоймайтынын, ол ең алдымен ел тағдыры, халықтың болашағы үшін жауапты, белсенді азаматтық ұстанымы және нақты нәтиже үшін жұмыс істейтінін есте ұстауымыз керек деп мәлім етті.

Еске сала кетсек, Қазақстанда биыл қаңтар айында Жаңаөзендегі газ бағасының көтерілуіне қарсы наразылықтар басталып, оның арты бүкіл елдегі жаппай шерулерге, кейбір қалада тіпті қантөгіске ұласқан болатын. Осы оқиғадан кейін бұрынғы президент Нұрсұлтан Назарбаевтың жақын адамдары қызметінен босатылып, кейбірі әртүрлі айыптармен қамауға алынды.

16 тамызда Бас прокуратура қаңтар оқиғасы кезінде қаза тапқан 238 адамның аты-жөнін жариялады. Олардың алтауы полицейлердің азаптауының құрбаны болған. 2 қарашада президент қаңтар оқиғасына қатысушыларға рақымшылық жасау туралы заңға қол қойды.