Алматыда құсбегіліктен ІІ Ашық Азия чемпионаты өтті
Алматы қаласы Алатау ауданы аумағында үш күн бойы өткен құсбегіліктен ІІ Ашық Азия чемпионаты 2 желтоқсанда түс ауа өз мәресіне жетті. Сөйтіп, 30 қараша күні туын көтерген бұл жарысқа әлемнің тоғыз мемлекетінен 71 құсбегі қатысып, бақ сынасты.
Аңға құс салудан, яғни құсбегіліктен өткен ІІ Ашық Азия чемпионатының бүркітшілер бәсекесінде барлығы 71 бүркітші бақ сынады. Солардың арасында оның жартылай финалына 10 бүркітші суырылып шыққан болатын. Бұл ретте бүркітті қолға шақыру мен шырғаға түсіруде Алматы облысынан Әбен Дулат, Тастанбек Байрақ, Сейітжан Аян, Байетбай Өмірхан, Түркістан облысынан – Аршабай Дәурен, Алматы қаласынан – Құрманғалиев Ақберен, Атырау облысынан – Қошқаров Арман, Словакиядан – Қанат Ярослав, Шығыс Қазақстан облысынан – Нұрман Өмірбек және қырғызстандық Исмаилов Аман үздік нәтиже көрсетіп, ақтық сынға жолдама алған болатын.
Міне, жарыстың соңғы күні осы он бүркітшінің ішінен құстарын қоян мен түлкіге жаңылмай, дөп түсіре білген мына төмендегі құсбегілер ІІ Ашық Азия чемпионатының жүлделі орындарын иеленіп, түрлі қаржылай сыйлықтармен марапатталды. Сонымен, аталған біріншілік қорытындысы бойынша бүркіт салуда 1-орынды қырғызстандық Исмаилов Аман, 2-орынды ақмолалық Тастанбек Байрақ ал жүлделі үшінші бәйгені Алматы қаласы атынан қатысқан бүркітшілер жеңіп алды.
Ал енді чемпионаттың соңғы күні бәсекеге түскен қаршыға, ителгі баптайтын 13 құсбегі арасынан Бабажан Берікболсын (1-орын), Махмутхан Заки (2-орын) және Сейітжан Бексұлтан (3-орын) секілді спортшылар жеңіске жетіп, ІІ Ашық Азия чемпионатында мерейлері үстем болды. Ал енді ителгі салуда қырғыз елінен келген Туголбой Абдуқадыров бірінші нәтижемен, алматылық Руслан Абдулов екінші көрсеткішпен және үшінші шеберлікпен жамбылдық Үсен Айбар бәрінен оқ бойы алда болды.
Әдеттегідей қызықты да тартысты өткен құсбегіліктен ІІ Ашық Азия чемпионаты бұл жолы да жоғары дәрежеде қорытындыланды. Бұл жарыста, әсіресе, қырғыз құсбегілері өте жақсы нәтиже көрсетіп, қазақстандық құсбегілерді екінші орын иеленуіне мәжбүр етті. Атап өтетіні, бұл бәсекеде бесінші орын алған құсбегілерге дейін сый-сияпатқа, яғни қаржылай марапатқа ие болды.
