Алматыда қайтыс болған науқас жайлы тың дерек шықты

Қазіргі кезге дейін елімізде 2 334 адамның коронавирус індетін жұқтырғаны расталған болса, дерттен айығып шыққандардың саны 568-ге жетті

НҰР-СҰЛТАН, 24 сәуір – Sputnik. Алматы қаласының қоғамдық денсаулық сақтау басқармасы коронавирустан қайтыс болған екі адам туралы ақпарат таратты, деп хабарлайды Sputnik Қазақстан. 

1957 жылы туған әйел 23 сәуірде көз жұмған, бұл туралы бүгін таңертең белгілі болды.

Марқұмның зайыбының айтуынша, ол бір апта бойы қақырықты жөтел мен дене қызуының көтерілгеніне шағымданған. Солай бола тұра, ол дәрігерге бармай, үйде өзі емделген.

23 сәуір күні аяқ астынан демі жетпей, есін жоғалтқан. Жедел жәрдем бригадасы шақырылғанымен, дәрігерлер жеткенше науқас қайтыс болды.

Ал коронавирусқа қатысты талдау қорытындысы оң нәтиже көрсеткен.

Оқи отырыңыз: Алматыда індеттен сегізінші адам көз жұмды

Қайтыс болған екінші науқас 1945 жылы туған. Ол 12 сәуір күні COVID-19 диагнозымен жұқпалы аурулар ауруханасына жатқызылған.

Науқаста осы кезге дейін жүректің ишемиялық ауруы, артериялық гипертония, алдыңғы ми артериясының аневризмі, созылмалы пиелонефрит, екі жақты пневмония сияқты ілеспелі сырқаттары болған.

«Ауыр жағдайда болғандықтан пациент жасанды тыныс алдыру аппаратына қосылған», – делінген баспасөз хабарламасында.

Айта кетейік, Қазақстанда аталған індет салдарынан көз жұмғандардың жалпы саны 24-ке жетті.