Алматыда Джеймс Хёрмэннің «Аргумент в пользу креативности» атты кітабының таныстырылымы өтті
Алматыда әлемге әйгілі жарнамашы Джеймс Хёрмэннің «Аргумент в пользу креативности» атты кітабынының алғаш рет орыс тіліндегі нұсқасы таныстырылды. Бұл аталмыш кітаптың алғаш рет орыс тілінде жарық көруі. Ол шығармашылық тұрғыда қазіргі заманғы іскерлік басылымдар үшін өте маңызды болып саналады. Сондай -ақ, автор креативтілік пен тиімділікке қатысты пікірталасқа нүкте қояды. Бұл кітапта әлемдік ірі компаниялардың өкілдері осы тақырып жайында терең талдау жасап, статистикаға негізделген өз тұжырымдарымен бөліседі.
BigWonReport есебі бойынша, кітаптың авторы Джеймс Хёрмэн әлемдегі №1 жоспарлау директоры. Ол 20 «Канн арыстандары» жүлдесі мен тиімділігі үшін 50-ден астам жүлденің иесі. Автор 30 жылдық тәжірибесіне сүйене отырып, креативтілік пен тиімділіктің, креативтілік пен компания табысының өсуі, креативтілік пен акция бағасының өсуі бір-бірімен тікелей байланысты екенін дәлелдейді. Ол бұл кітабымен халықаралық бизнес саласында сілкініс жасады.
Аталған кітапты Қазақстанда орыс тіліне аударып, басып шығару идеясының авторы — «А-3 Практикалық Жарнама Мектебінің» негізін қалаушы және Канн Арыстандары Халықаралық Креатив Фестивалінің Қазақстандағы эксклюзивті ресми өкілі Асхат Өскембаев. Оның айтуынша, автормен келісімге келу ол ойлағаннан да оңай болған.
«Мен бұл кітаппен алғаш рет Канн Арыстандары Халықаралық Фестиваліне барғанда таныстым. Неге орыс тіліне аударып, Қазақстанда басып шығармасқа деген ой келді. Автормен хабарластым, онымен келісу мен ойлағаннан да жеңіл болды, он бес-ақ минутта келісімге келдік. Оны аударуға бір жарым ай, ал басып шығару үшін екі айдан артық уақыт жұмсалды. Жалпы, жыл сайын жарнамаға миллиондаған қаржы бөлінеді, алайда креатив болмаса, ол ақша босқа кетті деген сөз. Біз экономикамыздың дамуына үлес қоспаймыз, ал девальвация, доллардың көтерілуі сынды мәселелерді айтып шағымдануға келгенде алдымызға жан салмаймыз. Сондықтан креативті болуға ұмтылуымыз керек. Қазақстан үшін креативті болу — өмір сүру сапасын жақсарту боп саналады. Әрі қарай алға жылжып, табысты болғысы келетіндер үшін бұл таптырмас кітап», — деді Асхат Өскембаев.
Кітаптың аудармасымен белгілі аудармашы, жарнама әлемінде үлкен тәжірибесі бар Анастасия Гончарова айналысқан. Ол өз кезегінде кітаптағы маңызды ақпараттарды қарапайым түсінікті тілде жеткізуге тырысқанын атап өтті.
Жалпы, «Канн Арыстандары» халықаралық креатив фестивалі (International Festival Of Creativity Cannes Lions) коммуникациялық индустрия саласындағы беделді халықаралық фестиваль саналады. Жыл сайын ол Францияның Канн қаласында өтеді, мұнда конкурстық бағдарламадан бөлек, семинарлар, оқу курстары мен байланыс саласының қызметкерлері үшін қоғамдық іс-шаралар өтеді. Ал оның басты оқиғасы коммерциялық және әлеуметтік байланыс саласындағы жылдың үздік жұмыстарын марапаттау («Арыстандар») салтанатты шарасы саналады.
Фестивальда жарнамалық кампаниялар үшін де, техникалық саладағы жетістіктер үшін де дәреже бар. Екі жағдай да «Алтын Арыстан» (Gold Lion) жүлдесі өз дәрежесінің үздік қатысушысына беріледі.
