Алматыда 45 күн бұрын пойызға билет таба алмаған студенттер жанайқайын айтты — новости Казахстана

Көрнекі фото: varandej.livejournal.com

Студенттердің пайымдауынша, 45 күн бұрын сатылымға шығарылатын билеттер айналдырған 1-2 сағаттың ішінде «өтіп кеткенге» ұқсайды.

«Жолушылар билетін бұрыннан бері интернет арқылы алып жүрміз. Сондықтан бұл жүйе бізге жақсы таныс. Алда мереке күндері сәйкесінше, демалыс жақындап қалды. Билет сату жүйесі 45 күн бұрын билеттерді сатылымға шығара бастайды. Алайда, 29 желтоқсанға билет жоқ. Жүйе «орын жоқ» деп көрсетіп тұр. Алматыдан кез келген бағытқа билет жоқ. Сонда қалай? Билеттердің онлайн-сатылымының ашылғанына небары 1-2 сағат өтті», — деп жазады студенттер «Жолаушылар тасымалы» компаниясы басшылығына.

Билет таба алмай сандалған студенттер жол құжатының әдейі сатылмай отырғанын алға тартады.

«Билетті бәлкім, сатып алып, қайта сату үшін жасап отырған болар. Жеке мақсатты көздегендер жүйені әдейі бұғаттап отырған болуы мүмкін. Осы күндерге сұраныстың артатыны белгілі, үстінен пайда көргісі келетін шығар», — дейді Алматыда білім алып жатқан студенттер қауымы.

Олар «Жолаушылар тасымалы» басшылығынан осы мәслені шешіп беру үшін көмек сұраған.

Өз кезегінде, хат келіп түскен «Жолаушылар тасымалы» компаниясының ғаламтордағы парақшасында қысқа жауап қайтарған.

«Сіздің шағамыңыз бойынша тиісті жұмыстар атқарылуда. Оқиғаның мән-жайы анықталған соң, сізге жауап берілетін болады», — делінген компанияның жауабында.