Алматы облысында ҰБТ-дан 140 балл жинаған оқушыға көлік сыйға берілді

Алматыда облысында ҰБТ-дан ең жоғарғы 140 балл жинаған оқушыға көлік сыйға берілді. Бұл туралы Kznews.kz ақпарат агенттігі хабарлайды.

Ұлттық бірыңғай тестілеуден 140 балл жинаған Жаннұр Еңсебек – Алматы облысындағы №22 мектептің түлегі. Жаннұр Есенбек ҰБТ тарихындағы 140 балл жинаған 3 оқушының бірі. Бұған дейін оқушыға Алматы облысының әкімі 500 мың теңге табыстаған.

Оқушы ҰБТ-ға қалай дайындалғанын айтып берді.

“Тапсыратын түні мүлде ұйықтай алмадым. Сосын тестілеу орталығына барғанда барлық сұрақтар оңай болып көрінді. Екі сағаттың ішінде барлық сұраққа жауап беріп үлгердім. Қалған бір жарым сағат жауаптарды тексеруге кетті. 140 балл жинағанымды көргенде қуанышымда шек болған жоқ”, – дейді Жаннұр.

Оқушы ҰБТ-ға дайындайтын ақылы курстарға уақыт жоғалтпай, үйде онлайн дайындалғанын айтады. Оқушының айтуынша, ол күн сайын математика мен информатика есептерін шығару бойынша 6-8 сағат жұмсаған.

Жаннұр қазір университет таңдап жатқанын айтады. Табысты оқушы IT саласында білім алуды жоспарлап отыр.