Алматы облысында бесінші баласын босанып, аяқ астынан қайтыс болған келіншектің өліміне ақ халаттылар кінәлі екендігі дәлелденді — Қазақстан жаңалықтары

Бір жыл бұрын тағы да ана атануға дайындалып жүрген бес баланың анасы Дильмира Максутова дәрігерлік қателік пен сәтсіз жасалған отадан кейін көз жұмған еді. Сот-медициналық сараптамасы жас келіншектің өмірін жалмаған бірнеше дөрекі дәрігерлік қателіктің орын алғанын анықтап, Дильмираның өмірін аман алып қалуға болатынын дәлелдеді. Бүгінде дәрігерлердің салғырттығы да дәлелденіп, олардың ісі сотқа жолданды. Қайғылы оқиғаға байланысты отбасының адвокаты Рустем Гаитов Stan.kz тілшісіне шындығында қалай болғанын бәрін бүкпесіз айтты. 

Ұйғыр аудандық орталық ауруханасына былтыр күзде 1984 жылы туылған Максутова Дильмира Мұхаметқызы босану үшін келген. Ауруханаға түскен күннің ертесіне босанғаннан кейін қан кетуіне байланысты биологиялық өлім анықталған. Мәйітті үйге алып келіп, жерлеу алдында туыстары Дильмираның денесінен күйік іздерін тапқан. Бұл сұмдықты көрген туыстары дәрігерлердің үстінен арыз түсірді. 

Осы іс бойынша айналысып келе жатқан Алматы қалалық адвокаттар алқасының мүшесі Гаитов Рустемге Дильмираның отасына қатысқан екі дәрігер атты-жөндерін жасыруын өтініп, бүкіл шындықты айтып берген. Адвокаттың айтуынша оқиға былай болған:

— Кесар тілігімен баланы босандырған соң, Максутовадан тоқтаусыз қан кете бастаған. Акушерлер кеткен қанның мөлшерін дұрыс анықтамаған. Анестезиолог келгенде 800 мл қан кетті деп айтқан. Анестезиолог айтқан қан мөлшеріне лайықтап дәрі жазып берген. Кейіннен сот-медициналық сараптамасы дәлелдегендей, іс жүзінде 1 литр 100 грамм қан кеткен.  

Анестезиологтың жазған емінен кейін де қан тоқтамайды. Кезекші дәрігер ота жасау қажеттігін айтады, ота жасалғанша әйелден 2 литр қан кетіп қалады. Сол аралықта екі акушер-гинеколог 15 минутқа сыртқа шығып кетеді. Ал хирург қоңырау шалып, келе жатқанын айтып, отаны бастай беруін сұрайды. Екі акушер-гинеколог маткасын алып, хирургты күтіп тұрады. Кезекші дәрігер не істеп тұрсыздар деп сұрағанда: «Біз ары қарай не істеу керектігін білмейміз» деген.

Жарты сағатқа кешігіп хирург келеді. Ол отаны жалғастырып, алған жатырдың екі тамырын тігу керек болады. Бірақ сол жақ тамырын тігіп, оң жағын тігуді ұмытып кетеді. Арадан 15 минут өткенде тіккен жерден қайтадан қан шыға бастады. Ота жасаған жерін қайта ашып, екінші хирургтың көмегімен тамырды тігеді. Сөйтіп екі операция жасалады. Реанимацияға шығарған кезде қыз қайтыс болады. Ота барысында үш рет қыздың жүрегі тоқтайды. 

Ертеңіне таңертең дәрігерлер бәрін жинап «арттарын тазалайды». Дәрігерлердің барлыған екі ота жасалғаны туралы тіс жарып айтпауға бұйрық түседі. Науқастың құжаттарын қайтадан толтырып шығады.

Құжаттардың барлығын фальсификация жасайды. Туу тарихын өзгерткенде анализ нәтижелерін де өзгертуге тура келеді. Аурухана директоры Долаева зертхананың орынбасарын шақыртып алып, анализ нәтижелерін өзгертуге бұйрық береді. Олар анализ кітаптарын жыртып тастап, қайта жасап шығады, — деген адвокат алғашында дәрігерлер өз істерінен жалтарғанын жеткізді.

— Тергеу жұмыстары басталғанда дәрігерлер өз кінәсін мойындамады. Тек жеті айға созылған сараптама нәтижелері белгілі болған соң ғана кінәсін растады.

Сараптама қорытындысы бойынша, Максутоваға кесар тілігін жасағаннан кейін көп қан кеткенін, оның мөлшерін дұрыс анықтамағанын, қыздың асқазаны жыртылып, төрт қабырғасы сынғаны, аяқтарында термиялық күйік іздері бары белгілі болды. Нәтижесінде дәрігерлер кінәсі дәлелденді, — деген адвокат Алматы облыстық денсаулық сақтау басқармасынның «өлімнің алдын алауға болар еді» деп анықтама бергенін айтады. 

Сол күнгі қайғылы оқиғаға қатысқан дәрігерлерден сараптама нәтижесі шығып, кінәсі дәлелденсе де бір акушер «мен қолымнан келгенін істедім, менің кінәм емес» деп әлі де қарсылық танытып отырған көрінеді. Ал дәрігерлік дөрекі қате жіберген хирург өз сөзінде бір тамырын тігіп, екінші тамырын қан көп кеткен соң таба алмағанын айтады.

Бүгінігі сот нәтижесі бойынша сот ісі кейінге қалдырылған. 

Айта кетейік, Ұйғыр орталық ауруханасында дәрігерлердің салғырттығынан болған қайғылы оқиға бұл ғана емес. Дәл осы ауруханада Динара Мусаева есімді жас келіншек кесар тілігін жасатып, 9 ай комадан кейін қайтыс болған.