Әлімханұлы Головкиннің бұрынғы қарсыласымен спарринг өткізді — Бокс

Қазақстандық кәсіпқой боксшы Жәнібек Әлімханұлы (4-0, 1 КО) Геннадий Головкиннің (38-1-1, 34 КО) бұрынғы қарсыласы — америкалық Доминик Уэйдпен (18-1, 12 КО) спарринг өткізді, -деп хабарлайды Vesti.kz.

Жаттығу жекпе-жегі алты раундтан тұрды және бұл қазақстандық боксшы үшін алдағы 28 жастағы «Жалдамалы баскесер» лақап атымен танылған америкалық Стивен Мартинеспен (18-4, 13 КО) жұдырықтасуға дайындық болды.

«Осы апта 14 раунд спарринг қалды. Бұйыртса келесі апта жекпе-жек. Тас түйін дайынбыз. Бүгінгі спарринг қарсылас Генамен жұдырықтасқан Доминик Уэйд. Бұл батырға да бүгін Қазақ бокс стилін таныстырдық! Жеңісті күнде жүздесейік», — деп жазды боксшы Instagram желісіндегі парақшасында. 

Еске салайық, Головкин Уэйдпен 2016 жылы жұдырықтасты. Қазақстандық боксшы қарсыласын екінші раундта нокаутпен жеңіп, Interim WBC, WBA (Super), IBF, IBO белбеулерін қорғап қалды, ал америкалық карьерасында алғаш жеңілді.

Головкиннен жеңілген соң Уэйд үш жыл рингке шықпады. 1-ші ақпанда ол аргентиналық Мартин Фидель Риоспен жұдырықтасу керек.