Әлімбекованың адвокаты: Назарова 10 миллионды қанағат тұтпай, енді 80 мың доллар сұрап отыр — Қазақстан жаңалықтары

Күні кеше Гауһар Әлімбекованың ісіне қатысты кезекті сот отырысы өтті. Екі тарап та сот әділ шешім шығарар деп күтті. Алайда үкім оқылмады. Отырыс тағы кейінге шегерілді. 

Фото: НТК арнасынан скриншот

Бұл туралы НТК арнасының «Ревю» бағдарламасында айтылды.

Екі жақтың дауына нүкте қойылар түр жоқ. Әншілер қауымы ақша жинап, Гауһардың қарызын қайтармақ болғанда, сомма толық емес деп Бақыт Назарова бас тартқан болатын. Ал кейіннен ол келіскенде, ақша берушілер айнып қалған. 

«Бұлардың жинаған ішінара жинаған сомасын алуға біз келісім бердік кейіннен. Олар кейін бас тартты. Үзілді-кесілді осымен ешқандай реніш жоқ деп келісуге болатын еді. Бірақ олар жинаған ақшаны да берген жоқ», — дейді жәбірленушінің адвокаты Марс Жанабаев.

«Әншілер қауымы әуелі 7 миллион ұсынды, осы соттың арасында жүргенде 10 миллион апарып берді. Ал енді қараңыз, маған 40 мың доллар беріңдер, сосын 40 мың долларға Гауһар расписка жазып берсін дейді. Сонда 80 мың доллар сұрап отыр», — дейді Гауһар Әлімбекованың адвокаты Шынқуат Байжанов.

Екі жақтың арасында болып жатқан дау сазгердің әріптестерін де әбден әбігерге салды. Бүгінде өнер иелері не істерлерін білмей, дал болып жүр. 

«Сотталып та кетуі мүмкін, ақталып шығуы да мүмкін. Осы жағдай мен болатын болсам, құрысыншы бере салшы деп айтар едім де мүмкін. Бұл жерде Гауһар ешқандай ақша бермеңіз деп отыр да. Менің арым таза, мен ешқандай қарыз емеспін деп отыр. Соған қарағанда шынымен де Гауһар кінәлі емес шығар деп ойлап отырмын», — дейді «Жігіттер» тобының продюсері Ерғали Әбдірайымов.

Гауһар Әлімбекова өз кінәсін мойындамастан, соттың әділ шешімін күтіп отыр. Ал оның бұрынғы құрбысы Бақыт Назарова алған бетімнен қайтпаймын деп отыр. 

«Маған келген залал қайтарылмайынша, мен бұл істі жай қалдырмайтын. Керек болса Жоғарғы сотқа, бас прокуратурға шағымданамын. Алған бағытымнан қайтпаймын!» — деді Бақыт Назарова сотта. 

Сот отырысы 10 сәуірге қалдырылды.