Әлеуметтік көмектің мөлшері 50 500 теңгеге дейін көбейетін болды

Алматы мәслихатының сессиясында жәрдемақыларды бірнеше есеге көбейту туралы ұсыныстар айтылды

АСТАНА, 19 наурыз – Sputnik. Алматыда бірнеше әлеуметтік көмектің мөлшері көбейеді.  

Қалалық мәслихаттың кезекті сессиясында әлеуметтік көмек, тұрғын үй көмегі және мүгедек балаларды үйде оқытуға арналған жәрдемақыларды бірнеше есеге көбейту туралы ұсыныстар айтылды. Яғни, жан басына шаққанда табысы күнкөріс деңгейінің екі есе мөлшерінен аспайтын тұрмысы төмен азаматтарға көрсетілетін көмек 50 мың 500 теңгеге дейін арттыру көзделсе, «Бақытты отбасы» бағдарламасы аясында отбасы шығынының шекті деңгейін 10 пайыздан бес пайызға дейін төмендету қарастырылған. Ал мүгедек балаларды үйде оқытатын отбасыға тоқсан сайын берілетін жәрдемақыны 30 мың теңгеге дейін арттыру жоспарлануда, деп хабарлады Almaty.tv.

«Өткен жылы жәрдемақы 800 балаға төленді. Биыл да осы 800 баланы қамтуды жоспарлап отырмыз. Бұл жәрдемақыны алу үшін қосымша 11,4 миллион теңге бөлініп отыр. Айтылған үш әлеуметтік көмектің үшеуі де бұрыннан бар, бұл жаңалық емес. Тек оларды алатын адамдардың саны мен көмектің көлемі ғана артып отыр», — дейді Алматы қаласы Әлеуметтік әл-ауқат басқармасының басшысы Рахат Шимашева.