Әкімдік «тұруға жарамды» деп айтқан үйден тұрғындар көше бастады

0

Бұған дейін өздері тұрып жатқан тоғыз қабатты ғимараттың бір жаққа қарай қисайғанына шағымданған Алматының «Зерделі» (бұрынғы — Алғабас-6) шағын ауданындағы №179 үй тұрғындары биліктен «апатты үйдің» жарамдылығын анықтап, баспана мәселесін шешіп беруді талап етіп отыр.

14 желтоқсанға қараған түні «апатты үйде» әрең қонып шыққан тұрғындар сенбі күні түс кезінде жақын маңдағы мектепке барып, билік өкілдерімен тұрғын үйдің жарамдылығы мәселесін талқылады. Тұрғындардың айтуынша, бір апта бұрын дабыл қаққан кезде «әкімдік өкілдері тұрғын үй тұруға жарамды» деп айтқан. Ал қазір ғимаратқа түскен сызаттар барған сайын үлкейіп барады. Тұрғындар ғимарат есіктері жөнді жабылмай, біртүрлі дыбыстарға да шағымданды.

Қазақ құрылыс және сәулет ғылыми-зерттеу және жобалау институтының атқарушы директоры Ербол Шоқпаров тұрғындарға соңғы үш күнгі дерек бойынша үйдің қисаймай тұрғанын, қазір тағы зерттеу жүріп жатқанын айтты. Оның сөзінше, қазір үй 7,5 саниметрге майысқан.

— Бақылау жүргізіп жатырмыз. 8 сантиметрден асса, динамика бар, қауіп бар деген сөз. Әзірге үй тұруға жарамды, — деді ол.

13 желтоқсанда түнде тұрғындардың қорқып, сыртта жүргені туралы ақпаратты естіген Азаттық тілшісі оқиға орнына барған кезде кейбір отбасылардың көшіп жатқанына куә болған. Ондаған адам ғимараттың ішіне кіре алмай сыртта жүрді. Кейбір азаматтар «баратын жер жоғын айтып» налыған. Сегізінші қабатта тұратын үш баласы бар әйелдің айтуынша, сүтті пісіру үшін газға қойған кезде қазандағы сүт қисайып, төгілген.

Қала әкімінің орынбасары Мұхит Әзірбаев Азаттық тілшісіне «проблема жоқ емес — бар, тек қазір соның деңгейін анықтап жатырмыз» деген.

2013 жылы «Қолжетімді баспана» мемлекеттік бағдарламасы бойынша пайдалануға берілген бұл тұрғын үйде 72 пәтер бар.

Алматыда «үйлердің қисаю мәселесі» осыдан бірнеше жыл бұрын да байқалған. 2016 жылы Алғабастағы тоғызқабатты тұрғын үйдің 32 сантиметрге қисайғаны анықталып, жергілікті билік оларды сүру керек деп мәлімдеген.

Қарай отырыңыз: «Құлап кете ме деп қорқамыз». Алматыда көпқабатты тағы бір үй қисайды (11 желтоқсан 2019 жыл).

Azattyq