Агроөнеркәсіптік кешен: Субсидиялар саны қысқарады

BAQ.KZ тілшісі. Бүгін Үкімет отырысында Ауыл шаруашылығы вице-министрі Арман Евниев Агроөнеркәсіптік кешенді дамытудың 2017–2021 жылдарға арналған мемлекеттік бағдарламасын іске асыру жөнінде есеп берді.

Агроөнеркәсіптік кешен субъектілерін қаржыландыру қолжетімділігін арттыру үшін 8 нақты шара көзделген.

«2018 жылы негізгі құралдарға арналған кредиттер бойынша сыйақы мөлшерлемелерін субсидиялау, сондай-ақ ауыл шаруашылығы техникалары мен жануарларының лизингі қалпына келтірілді. Биыл 10 айда 50 млрд теңгеден астам 2752 бірлік техниканы лизингке алу мүмкін болды. Өткен жылмен салыстыратын болсақ 40 млрд теңгеге, немесе 20 пайызға төмен 2400 техника берілді. Бағдаралма ағымдағы жылдың екінші жарты жылдығында іске асырыла бастағанын ескерсек, бұл – жақсы нәтиже. Жалпы 2018 жылы лизинг бағдарламасына 60 млрд теңгеге дейін қаржы бағыттау жоспарланып отыр», — деп айтты Евниев.

Ауыл шаруашылығы вице-министрі инвестициялық субсидиялау бойынша тәсілдемелер өзгертілгенін, енді инвестициялық салымдарды өтеу үлесі барлық паспорттар бойынша 25 пайыз болып белгіленгенін атап өтті. Тек жайылымдарды суландыру инфрақұрылымын құру жобалары бойынша өтеу пайызы 80 пайыз деңгейінде сақталатын болады және бұл жаңа инвестициялық жобаларға бастама жасауға серпін берді.

«Егер былтыр «ҚазАгро» желісі бойынша 45 млрд теңгеге 40 ірі инвестициялық жоба мақұлданса, ал биыл жыл басынан бері құны 104,5 млрд теңге 76 жоба мақұлданды», — деді вице-министр.

Евниев мемлекеттік қолдау шараларының тиімділігін арттыру шеңберінде тиімсіз субсидиялар саны қысқартылатынын айтты. Мұндай субсидияларға өсімдік шаруашылығындағы гектарлық, мал шаруашылығындағы өнімділікті субсидиялау жатқызылады. Реформалау қорытындысы бойынша 54 субсидия түрінен 34 субсидия қалады. Қалғандары барынша оңтайландырылып, жыл соңына дейін толықтай автоматтандырылатын болады.

Біздің Telegram-парақшамызда Қазақстанның маңызды жаңалықтары. Жазылыңыздар!