42 500 теңгені қанша қазақстандық алады
Халықты жұмыспен қамту үшін «Жұмыспен қамтудың жол картасы» бағдарламасын қаржыландыру 1 триллион теңгеге ұлғайтылды
НҰР-СҰЛТАН, 2 сәуір – Sputnik. Төтенше жағдайға байланысты кірісінен айырылған 3 миллион қазақстандық 42 500 теңге алады. Бұл туралы үкімет басшысы Асқар Мамин мәлімдеді, деп хабарлайды Sputnik Қазақстан тілшісі.
Премьер-министр әлеуметтік төлем алушылар қатары кеңейгенін атап өтті. Олардың арасында өзін-өзі жұмыспен қамтығандар мен тұрмысы төмен азаматтар бар.
«Шамамен 3 миллион қазақстандық 42 500 теңге мөлшерінде төлемақы алатын болады», — деді Мамин үкімет отырысында.
Бұдан бөлек, ол халықты жұмыспен қамту үшін «Жұмыспен қамтудың жол картасы» бағдарламасын қаржыландыру 1 триллион теңгеге ұлғайтылғанын айтты.
Бұл 240 мыңнан аса жаңа уақытша әрі тұрақты жұмыс орнын құруға мүмкіндік бермек.
Бұдан бөлек, 700 мыңнан аса бизнес субъектісі салықтық жеңілдіктерге ие болады.
sputniknews.kz