42 500-ді аласыз ба, әлде алмайсыз ба – енді өтінішті өзіңіз тексере аласыз
Қысқа сілтеме алу
Енді қазақстандықтар 42 500 теңге жәрдемақыға берген өтініші қандай кезеңде қаралып жатқанын тексере алады
НҰР-СҰЛТАН, 12 сәуір – Sputnik. Еңбек және халықты әлеуметтік қорғау министрлігі әлеуметтік төлем алуға берген өтініштің статусын тексеруге мүмкіндік беретін сервисті іске қосты. Бұл туралы вице-министр Нариман Мұқышев хабарлады.
«Біз үнемі әлеуметтік желілерді қарап отырамыз. Қазіргі уақытта адамдардың ең көп сұрайтыны – «Мен бірнеше күн бұрын өтініш бердім, бәріқ әлі күнге дейін жауап жоқ». Сондықтан Біржан Нұрымбетовтің (Еңбек және халықты әдеуметтік қорғау министрі – Sputnik) тапсырмасы бойынша 42 500 теңге төлем бойынша статусты тексеретін сервис іске қосылды», — деп жазды вице-министр Instagram-парақшасында.
Сонымен, өз статусыңызды тексеру үшін:
- 42500.enbek.kz сайтына кіріңіз
- «Өтінім статусын тексеру» деген жерді басыңыз
- ЖСН мен жеке куәлік нөмірін енгізіңіз
- “Мен робот емеспін” деген жерге ✔ белгісін қойып, “тексеру” батырмасын басыңыз.
Бірден өтінішіңіздің статусы шыға келеді.
Айта кеткен жөн, бір құрылғыдан бір сағаттың ішінде тек 3 сұраныс жібере аласыз.
Бұған дейін еңбек министрлігі 42 500 теңге мөлшеріндегі жәрдемақыны төтенше жағдай режимі кезінде екінші рет алу мүмкіндігі туралы хабарлаған еді.
sputniknews.kz
