2013 жылдан бастап республика көлемінде «Елбасытану» атты элективті курс жүргізіліп келеді

Аталмыш курс негізінде Елбасының тұлғалық қалыптасу кезеңдерін көрсетіп, оны жастарға өнеге ету арқылы отансүйгіштікке тәрбиелеу ісі қолға алынуда. Атап айтар болсақ, бұл курс алғаш рет 2013-2014 жылдары елорданың Ж.Жабаев атындағы мектеп-гимназиясы, №50 «Қазғарыш» мектеп-лицейі және № 38 мектептің оқушыларына өткізіле бастады. Бұл жұмыс әрі қарай жалғасын тауып, Ақмола облысы Еңбекшілдер ауданы және Аршалы ауданына қарасты Қосшы ауылдық округінде, Алматы облысы Қарасай ауданы Абай мектебінің оқушыларына арнайы дәріс өткізілді.

Осынау шара аясында Елбасының сыныптас­тары мен замандастары: С.Есімбай, Қ.Сарекенов, К.Әмірова, К.Байбосынов, Р.Сиразитдинова, Т.Сыпаев, А.Әбдіраманов, М.Қыстаубаев, И.Оразбаев, Е.Сапарбаев, А.Мырзаметов, Ә.Кәрімовтердің қатысумен «Өне­гелі өмір, өш­пес мұра» атты рухани кеш ұйым­­дастырылып, Президентіміздің ту­ған өл­кесі Қаскелең, Ша­мал­ған, Үшқоңыр ел­ді ме­кен­дері және білім алып, қыз­мет атқарған Днепродзержинск, Алматы, Теміртау, Қарағанды қа­ла­ларына ғылыми-іздестіру жұ­мысы жүргі­зілді. Нә­ти­жесінде 50-ге жуық дерек қоры (сұхбаттар, естеліктер, мұрағаттар) та­былып, олар көпшілік назарына ұсынылды. 

Осы орайда, Н.Назарбаевтың бұған дейін бел­гісіз болып келген 1956 жылы «Жас натуралис­тер» ұйымына мүше ретінде Бүкілодақтық ауыл­­шаруа­шылық көрмесінің медаліне ие болуы, со­нымен қатар «Комсомольская правда», «Ка­зах­станская правда» сынды бүкілодақтық, респуб­ли­калық газеттерде жарияланған мақалалар, ресей­лік мұрағат қорларынан алынған Нұрсұлтан Назарбаевтың өндіріс озаттарымен бірге космонавт Валерий Быковскийдің қолынан ғарышта болып келген комсомол төсбелгісін алуы, Қазақстан ком­сомолының Х, ХІІ съездеріне, БЛКЖО-ның ХIV cъезіне, Финляндияның Хельсинки қаласында өткен VIII Бүкіләлемдік Жастар мен студенттер фес­тиваліне қатысуы туралы ақпараттар, құжаттар мен фотосуреттер құнды дүние ретінде бағаланып отыр. 

Осылайша еліміз көлемінде «Елбасытану» әліппесін тұрақты жүргізудің нәтижесінде дерек қоры жинақталып, олар «Атамекен» брошюрасы, «Қоғамдық-саяси тақырып бойынша экскурсия жүргізу және дайындау» атты әдістемелік құрал, «Елбасы: өмірбаяны, бастамалары және саяси ұс­танымы. Замандастар естеліктері» атты жинақ, «Ұлағатты ұстаздар» альбомы сынды кі­­тап болып жарық көрді. Сонымен қатар Қа­зақ­­стан Республикасының Тұңғыш Президенті – Елбасының Кітапханасы музейінің үнпарағы «Мирас» қоғамдық-саяси және ғылыми-көпшілік журналы арқылы 30-ға жуық естелік-сұхбат пен мақала жарияланды. 

Соңғы рет, яғни биылғы қараша айының 18-25-і аралығында ғылыми-іздестіру тобы 1959-1960 жылдары Елбасы білім алған Украина елін­дегі Днепродзержинск қаласындағы №8 тех­никалық училищеде болып келді. Ғылыми топты қала басшысының орынбасары Т.Завгородник қабылдап, училищенің тарихымен таныстырды. Іздеу­шілер оқу орнының мұрағатынан жас жігіт Нұр­сұлтан Назарбаевты оқуға қабылдау туралы 1958 жылғы 20 қарашадағы №12 бұйрықты жә­не үздік оқығаны, қоғам және комсомол жұ­мыс­тарына белсене қатысқаны үшін табыс етілген «Мақтау қағазы» т.б. мәліметтер тауып қайтты. 

Ләйла ОМАРОВА, 

Қазақстан Республикасының  Тұңғыш Президенті – Елбасының Кітапханасының  жетекші ғылыми қызметкері