GGG мен «Канело» бапкерлерінің жекпе-жекте боксшыларға қандай кеңес бергені анықталды

FightSpace World YouTube-каналы Геннадий Головкин мен Сауль Альварестің бапкері биыл 15 қыркүйекте Лас-Вегаста өткен реваншта боксшыларға сыбырлап айтқан сөздерінің видеосын жариялады, — деп хабарлайды Vesti.kz.

Үшінші раундтан кейін бапкер Эдди Рейносо «Канелодан» жайбарақат жүрмеуін өтініп, Головкин сияқтылар «жекпе-жекті бір соққымен аяқтай салатынын» ескертті. Осыдан кейін ол жас ерекшелігін пайдалануға және соққы алмасуды қолға алмауға кеңес берді.

Оныншы раундтан кейін Рейносо былай деді: «Сауль, ақымақ сияқты соққы алмасумен тәуекелге барма. Мені естисің бе? Жекпе-жек жақсы өтіп жатыр, сенде барлығы дұрыс. Сен оны нокаутқа түсіре алмайсың, талпынбай-ақ қой. Ол тым күшті».

Өз кезегінде Абель Санчес бесінші раундтан кейін Головкинді қарсыласын нокаутқа түсіруге шақырды. Сәлден кейін қазақстандықтың бапкері тәсілдерді ұмытып, қаттырақ ұруға кеңес берді.

«Бұл жігітпен төбелес», — деді Санчес жетінші раундтан кейін. Соңғы үш минуттықтың алдында ол Головкиннен бар күшін салуды және соққыларды қайта бағыттауды сұрады.

Айта кетейік, Головкин мен Альварестің бірінші жекпе-жегі 2017 жылы қыркүйекте өтіп, екеуі тең түсті. Реваншта «Канело» жеңіп, Головкин мансап жолында бірінші рет жеңіліс тапты. Алайда көптеген сарапшының пікірі бойынша, екі жекпе-жектің де нәтижесі даулы. Келесі жылы қазақстандық пен мексикалық қайта жұдырықтасуы мүмкін.