Жолда жүріп ораза ұстай берсем бола ма?
![](https://kznews.kz/wp-content/uploads/2018/11/1495531712_86afab45b8.png)
Мен халықаралық автобуспен Алматыдан Шымкентке қарай жиі қатынаймын. Биыл күн ыстық болса да ауыз бекіттім. Осы ретте сұрайын дегенім, жолда жүріп ораза ұстай берсем бола ма?
Эльвира, Шымкент қаласы
Бұл сұраққа Қазақстан мұсылмандары діни басқармасының қызметкері Абдусамат Қасым жауап береді:
Жаратушы Иеміз Алла тағала ораза кезінде пенделеріне кейбір жағдайда ораза ұстамауға рұқсат еткен. Сол рұқсаттардың бірі — жол жүргенде ораза ұстамау. Бұл дегеніміз: ауызы берік адам өзінің тұрақты жерінен ең кемі 85-90 шақырым ұзақтықтағы жерге жолға ниеттеніп шықса, ол кісіге ораза ұстамауына рұқсат етіледі. Бірақ – міндет емес. Яғни, кімде кімнің жолаушы кезінде оразаға қауқары жетсе, аузын ашқаннан гөрі оразасын жалғастыра бергені абзал. Ендеше, сіз де: «жол жөнекей ораза ұстауға күшім жетеді», — десеңіз ауызыңызды ашпағаныңыз дұрыс.