Жеңілдеудің жеңіл жолдары
1-әдіс: Суретіне қарап ұрысу
Оңашада ашуың келген адамның суретін қабырғаға іліп ап, оған ойыңа келгенін айт. Жасырма, бәрін айт. Өңменінен өтіп кететіндей сөз естіп тұрған өзі емес, жансыз суреті ғой. Қандай ренішің бар? Неге оған ашулысың? Көз алдыңда сурет емес, ол тұрғандай сөйлей бар. Ішіңдегі ашудың азулы арыстанын жайына жібер. Бәрін айтып босап қалған соң баяғы өкпе-ренішің бойыңда қайта қылт етпеу үшін біржола бәрін кешір. Ашуыңды төгіп болған соң, суретті жырт та, қоқысқа лақтыр.
2-әдіс: Жылап алуьотм и
Көз жасқа ерік бермей, бар қайғыны қабаттап іште сақтайтын жандардың жағдайы мәз емес. Қара өгіздей қабағы қатулы бос өксік тыныш өмір сүруге кедергі. Көзінің жасын сығып алатын адамдар жылай алмайтындарға қарағанда жеңіл өмір сүреді. Сондықтан қандай да бір жағдай жаныңызды жаралап, көңіл көмбеңіздің быт-шытын шығарып жатса, оңашада жылап алғаныңыз абзал. Көңілдегі бар кірбің көз жасымен жуылып кетсін деп тілеңіз. Іште жиналған өксік бір күні құйынға айналып өзіңізді де, өзгені де ренжітетіндей күшке ие болмасын десеңіз, жай ғана жылап алыңыз. Болды…
3-әдіс: Хабарлама немесе хат жазу
«Осылай айтып-айтып тастасам ғой» деп жинап жүрген ойларыңызды не қағаз бетіне түсіріңіз не SMS хабарлама етіп жазыңыз. Тек оны жолдаудың қажеті жоқ. Хатқа сол оқитындай ақтарылыңыз. Бәрін жазыңыз. Ештеңе қалып кетпесін. Жазып болған соң хатты жыртып тастаңыз. Жыртылған хатпен бар өкпе-ренішіңіз де кетсін. Ал жазылған хабарламаны не өшіріп тастаңыз, не сырыңызды білетін құрбыңызға жолдай салыңыз. Оған мұны шимай хабарлама екенін ескертіңіз. Хабарламадағы сөздер оған емес, басқа жанға арнап жазылғанын айтып қойыңыз. Әйтпесе тағы бір адамды ренжітіп жүрерсіз.
4-әдіс: Ағын суға ақтарылу
Санаңыздағы қоқыс ойлар мен шешімі табылмас мәселелер маза бермесе, сарылдап аққан судың көмегіне жүгініңіз. Ағын суға қарап отырған адамның мәселелесі түбегейлі шешіліп кетпесе де, айтарлықтай миы сергіп қалады.
