Ғашық жұпқа бір-бірінен не керек?
Қызға жігіттен не қажет? Жігітінің мәңгілік назары. Көп жігіт қызды қымбат сыйлықтармен ғана қуантамын деп ойлайды. Жоқ. Сіз үнемі оның сөзіне құлақ асып, еш сұрағын жауапсыз қалдырмай, басқа жақта жүргенде де ойыңызда осы қыз жүретінін білдіріп, жиі-жиі хабарын алып отырсаңыз, қызға одан артық сыйлықтың қажеті жоқ. Қызға қамқор, қорған болу деген тек қауіпті жағдайдан құтқару емес, күнделікті жылы киінуін, тамағын уақытылы жеуін айтып, денсаулығына, болашағына алаңдап отыруыңыздың өзі оған бейжай қарамайтыныңызды, сезіміңіздің терең екенін көрсетеді. Сіз оған әрдайым назар аударып, көңілін таба білсеңіз, ол да үнемі өзіне қарап, сымбатына, сырт келбетіне баса көңіл бөледі. Осындай қарым-қатынас арқылы «қыз кезінде бәрі жақсы» деген сөзді қолданбауға өзіңізге өзіңіз жағдай жасайсыз.
Жігітке қыздан не керек? Қыз жігітті ештеңемен қамтамасыз етпейді. Бірақ екеуін де бар қажеттілікпен қамтитын нәрселерді табуына қыз түрткі болады. Жігіті үшін оның ақшасы да, көмегі де, қызметі де еш маңызды емес. Қаражаттан қиналса, оған демеушілік жасамаңыз. Ер басымен әйел затының қолына қарау ер азамат үшін намыстың әңгімесі. Керісінше, сіз сол қаржыны өзі табуы үшін жігерлендіріңіз. Жігітке қыздан тек қолдау керек. Қай істі де дөңгелентіп әкетеріне сенім білдіріңіз. Оны үнемі қолпаштап, айтқанын құптап отырыңыз, шешіміне қарсы шықпаңыз. Тіпті сіздің айтқаныңызды істеді деген күннің өзінде «бұл өз шешімім» деп ойлайтындай жағдай туғызыңыз. Тек ақша табу мәселесі емес, үйдегі қарапайым шеге қағу сынды жұмыстарға ебі жоқ болса, өзіңіз істей салмай, оның ер азамат екенін айтып, қолынан бәрі келетініне шын сеніп, қалай болса да өзі үйреніп алуына итермелеңіз. Билеп-төстемеңіз. Жай ғана қолдау көрсетіңіз.
