Тоқаев қазақстандық дәрігерлерге үндеу жасады
Қысқа сілтеме алу
Президенттің тапсырмасымен үкімет резервінен дәрі-дәрмек, тест жүйелер мен зертханалық жабдықтар сатып алу үшін ақша бөлінген
НҰР-СҰЛТАН, 16 наурыз – Sputnik. Дәрігерлер қазақстандықтардың денсаулығын сақтау үшін қолдан келгенін аянып қалмауы керек. Бұл туралы мемлекет басшысы Қасым Жомарт Тоқаев отандық телеарналар арқылы жасаған үндеуінде айтты, деп хабарлайды Sputnik Қазақстан тілшісі.
«Бұл күндері денсаулық сақтау жүйесінің қызметкерлеріне үлкен салмақ түседі. Олардың кәсібилігі мен адами қарым-қатынасына көп нәрсе байланысты. Біздің дәрігерлер еліміз үшін қиын кезеңді абыроймен өткеріп, қазақстандықтардың денсаулығын сақтау үшін қолдан келгенін аянып қалмауы керек», — деді Тоқаев үндеуінде.
Айтуынша, президенттің тапсырмасымен үкімет резервінен дәрі-дәрмек, тест жүйелер мен зертханалық жабдықтар сатып алу үшін ақша бөлінген. Ауруханаларда төсек орын жеткілікті.
«Мемлекеттік органдар санитарлық-профилактикалық және эпидемияға қарсы шараларды ұйымдастыру бойынша жоспарлар әзірленгенін ерекше атап өткім келеді. Қазақстан азаматтарын өкілетті қызметтерге жәрдемдесуге шақырамын», — деді мемлекет басшысы.
Тоқаев қазақстандықтарды жауапкершілік пен тәртіпке үндеді.
Аурудың алғашқы белгілері байқалған жағдайда, дереу дәрігерге қаралуға кеңес берді.
«Медициналық тексерістен жалтарғандар дәне карантин режимін бұзғандар жалазанады», деді президент.
Сөз соңында Тоқаев азаматтарға вирустан сақтанудың ең қарапайым жолдарын еске салды.
«Қолды жиі жуып, санитарлық гигиенаны сақтаңыздар. Халық көп жиналатын орындарға бармаған абзал», — деп атап өтті мемлекет басшысы.
sputniknews.kz
