Коронавируспен күресіп жатқан дәрігерлердің жалақысы 2-3 есе өседі

0

Қазір дәрігерлер төрт ауысыммен жұмыс істеп жатыр. Екі-үш айда олардың жалақысын көтеру жоспарланып отыр

НҰР-СҰЛТАН, 17 наурыз – Sputnik. Денсаулық сақтау министрлігі коронавируспен күреске жұмылдырылған дәрігерлердің жалақысын екі-үш есеге көтереді. Бұл туралы ведомствоның ресми өкілі Диас Ахметшәріп мәлімдеді, деп хабарлайды Sputnik Қазақстан тілшісі.

Ол төтенше жағдайға байланысты ақ халаттылардың жұмыс кестесі өзгергенін атап өтті. Қазір дәрігерлер төрт ауысыммен жұмыс істейді.

«Министрлік тарапынан толыққанды қолдау бар. Министрдің бұйрығы бар, алғы шепте жүрген дәрігерлерге екі-үш айда жалақысын 2-3 есе көтеру қарастырылып отыр,» — деді Ахметшәріп ұлттық арнадағы «Ашық алаң» бағдарламасында.

Соңғы дерек бойынша, Қазақстанда 27 адам коронавирус жұқтырды. Оның 13-і Алматыда, қалған 14-і Нұр-Сұлтан қаласында.

Біртанов: Коронавирус – емделетін инфекция

Айта кетсек, індетке шалдыққандар арасында екі жасар сәби де бар.

1536 адам стационарлық карантинде, ал 1094 адам үй карантиніне алынған.

Коронавирустың алдын алу мақсатында елімізде 16 наурыз таңғы сағат 08.00-ден бастап төтенше жағдай режимі жарияланды. Ол 15 сәуір таңғы 07.00-ге дейін күшінде болады.



sputniknews.kz