Алматыда «Нұр Отан» митингісі өтіп жатыр

0

Алматыда «Сарыарқа» кинотеатрының артында «Нұр Отан» партиясы митинг өткізіп жатыр. Шараны ұйымдастырушылар оған шамамен 1500 адам қатысып жатқанын айтады. Кейбір қатысушылардың «Соғысқа қарсымыз», «Біздің күшіміз бірлікте», «Экстремисті қолдама» деген жазуы бар плакат ұстап тұрғаны да көрінеді.

Бір апта бұрын осыған ұқсас митинг Нұр-Сұлтанда да өткен еді. Онда «ел арасына іріткі салып жүрген арандатушылардың қитұрқы әрекеті» жайлы айтылған.

Оқи отырыңыз: «Нұр Отан» партиясы «ел арасына іріткі салған арандатушыларға қарсы» митинг өткізді

Дәл сол күні Алматыда бірқатар белсенділер «Сарыарқа» кинотеатрының артында рұқсат етілген митинг өткізіп, онда қоғамдық-саяси, әлеуметтік мәселелер айтылған. Бірақ сол мезетте кинотеатр маңындағы базар мен саябақ жабылған еді. Белсенділер биліктің соңғы бірнеше жылда алғаш рет митинг өткізуге рұқсат бергенін, алдағы уақытта мұндай митингті ешкім көрмейтін кинотеатр артында емес, қала орталығында өткізуді ұсынған.

ВИДЕО: Алматыдағы митингте не айтты? (30 маусым 2019 жыл).

Сәуір айында «Нұр Отан» партиясы елдің бірінші президенті Нұрсұлтан Назарбаевтың ұсынысымен Қасым-Жомарт Тоқаевты кезектен тыс президент сайлауына кандидат ретінде шығарған еді. 9 маусымда өткен президент сайлауының ресми нәтижесі бойынша, сайлауда 66 жастағы бұрынғы сенат спикері Қасым-Жомарт Тоқаев жеңіске жеткен.

Халықаралық ұйымдар, оның ішінде БҰҰ-ның адам құқықтары жөніндегі кеңсесі Қазақстан билігін сайлау күні және одан кейін бейбіт наразыларды ұстағаны үшін айыптады. ЕҚЫҰ-ның бақылаушылар миссиясы сайлау кезінде көптеген заңбұзушылық пен азаматтарды ұстау болғанын айтып сынады.

Президент өкілетіне кіріскен Тоқаев Қазақстанда бейбіт митингілер туралы жаңа заң қабылданып, оны өткізуге рұқсат беріле бастайтынын хабарлаған. Сыншылар Тоқаев уәде еткен «жаңалықтардың бәрі» қазіргі заңда бар, билік түрлі сылтау айтып, митинг өткізуге жүйелі түрде рұқсат бермей отыр деп айтқан.

Azattyq

Загрузка...

ПІКІР ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз