Алдағы күндері елімізде боран соғып, жаңбыр жауады
Синоптиктер 22-24 қараша күндері ауа райы қандай болатынын айтты.
Солтүстікте қар жауып, боран соғады, оңтүстікте жаңбыр соңы жабысқақ қарға ұласады, деп хабарлайды Қазгидромет.
«Бұл күндері Қазақстанның солтүстік, орталық, шығыс және батыс облыстарында қар жауып, қатты жел соғады, көктайғақ күтіледі. Мұндай күрделі метеорологиялық жағдай Батыс Сібірдегі белсенді циклонмен байланысты атмосфералық ағындардың өтуі кезінде байқалады», — делінген «Қазгидромет» хабарламасында.
Сондай-ақ, республиканың оңтүстік және оңтүстік-шығыс облыстарында да жауын-шашынды болады. Мұнда оңтүстік циклонның ықпалымен жауын-шашын, жаңбыр, сулы қар күтіліп, 24 қарашада таулы аймақтарда қар қалың түсіп, тұман, көктайғақ болып, батыс бағыттан екпінді жел соғады.
