Арақ ішіп қойған адам ертесіне намаз оқи ала ма?
Сұрақ: Әссәләмуғалейкум! Арак ішкен адам дарет ала ма, әлде ғұсыл ала ма? Арақ ішкен адам намаз оқи ала ма? Толық нақты малімет болса! Алла разы болсын. Теміржан Кәримов
Сұрақ: Намаз оқып жүріп арақ ішіп қойсаң, ертесіне намаз окуға бола ма? Қанат.
Уағалейкумуссәләм уә рахматуллаһи уә бәракәтуһ!
Арақ ішу – Исламда ауыр күнәлардан саналады. Қасиетті Құранда «шарап — лас, шайтанның істерінен» делінсе, хадисте: «ішімдіктің азы да, көбі де харам» — деген. Басқа бір сахих хадисте Пайғамбарымыз (с.а.у.): «Араққұмар – пейішке кірмейді» дейді[1].
Арақ ішкен адам намазын тастамай, құлшылығын жалғастыруы керек. Арақ ішкені себепті намаз оқу міндетінен босатылмайды. Қайта намаз — күнәсіна тәубе етудің бірден бір жолы. Тіпті, ғалымдарымыз айтады: ес-түсін жоғалтпаған, не айтып, не қойғанын білетін кісі уақыты келген намазға тұруы тиіс деп. Құранда: «Не айтқандарыңды білгенге шейін (намазға жақындамаңдар)», — делінген[2]. Бұл – намаздың қаншалықты маңызды құлшылық екендігін көрсетеді.
Ондайда ғұсылдану ерікті іс. Дәрет алумен шектелуіне де рұқсат.
Алайда, ішімдік ішкен кісінің оқыған намазының қырық күн бойы сауабы болмайды. Тек, мойнындағы намаз оқу міндетінен құтылған болады. Пайғамбарымыз (с.а.у.) былай деген:
«Кімде-кім, шарап ішіп мас болса, оның қырық күн (сабахән) намазы қабыл болмайды. Одан кейін күнәсіне тәубе етсе, Алла оның тәубесін қабыл етіп кешіреді…»[3].
Хадис шәрифтегі «қабыл болмайды» деген сөз – оқыған намазына сауап жазылмайды дегенге ишара. Бұған қатысты ғұлама Имам ән-Нәуәуи былай дейді:
«Намазынын қабыл болмауы – оқыған намазының сауабы болмайды деген мағынада. Десе де, мойнындағы намаз оқу міндетін өтегенге саналып, кейіннен ол намаздардың қазасын оқудың қажеті жоқ»[4].
Алла Тағала баршамызды тура жолына бастап, теріс шайтанның жолына түсіп кетуден сақтасын!
Абдусамат Қасым
