Қазақша өлең: Несіпбек Айтұлы (Бөрітостаған)

0

Қазақша өлең: Несіпбек Айтұлы (Бөрітостаған) казакша Қазақша өлең: Несіпбек Айтұлы (Бөрітостаған) на казахском языке

Шығыс Қазақстанда Ақсуат жерінде мидай жазық далада жатқан алып жұмбақ тастың аты

Бөрітостаған,
Бөрітостаған,

Жұмбағыңды айтшы, кəрі тас маған?
Таңырқасын деп жердегі пенде,
Аспаннан бəлкім пері тастаған.

Жатырсың күтіп тағдырдан нені,
Айналып тасқа қаңғырған бөрі.
Емес пе екенсің ертеде келіп,
Құдайдың ұмыт қалдырған мөрі?

Толқытып тұрсың санама сыймай,
Əлемнің жеті ғаламатындай.
Кім екен тастап жапанға жалғыз,
Сыйлаған тағдыр саған осындай?

Бүп-бүтін іргем сөгіліп көптен,
Көз жасым қанша егіліп төккен.
Сен де бір мұңлық, мен де бір мұңлық,
Тауынан туған бөлініп кеткен…