2 желтоқсан, 2025
Ішкі істер министрлігі желіде тараған «камералар жылдамдықты 66 км/сағаттан бастап тіркей бастайды» деген хабарға қатысты түсініктеме берді, деп хабарлайды kznews.kz.
«Жүргізушілер, абай болыңыздар! Бүгін түнгі 00:00-ден кейін камералар 66 км/сағаттан асқан жылдамдықты бірден тіркейді. Мен әдетте 68–69 км/сағатпен жүретінмін. Енді 68 немесе 70-пен жүрсеңіз, 19 000 теңге айыппұл келеді. Жүйені артық ақшаға толтырмаңыздар», – делінген желіде тараған жазбада.
Ішкі істер министрлігі бұл ақпараттың шындыққа сәйкес келмейтінін ресми түрде растады.
«Түннен кейін “жылдамдық 66 км/сағаттан аспауы тиіс” деген ақпарат жалған. Ешқандай өзгеріс енгізілген жоқ. Елдімекендерде жеңіл көліктер үшін белгіленген жылдамдық бұрынғыдай 60 км/сағ. Камералар тек 70 км/сағаттан асқан жағдайда ғана бұзушылықты тіркейді», - делінген министрлік хабарламасында.
Полицейлер халықты тек ресми дереккөздерге сенуге шақырды.
