Қазақстанда жүргізуші куәлігін алғаш рет рәсімдеу енді «ЦОН» мобильді қосымшасы арқылы онлайн қолжетімді болды, деп хабарлайды «Азаматтарға арналған үкімет» мемлекеттік корпорациясы.
Енді азаматтар өтінішті мамандандырылған ХҚО-ға бармай-ақ, қосымша арқылы бере алады. Жүйе медициналық анықтама мен автомектепті аяқтау туралы куәлікті, сондай-ақ шектеулердің болуын мемлекеттік деректер базасы арқылы автоматты түрде тексереді.
Өтініш жіберілгеннен кейін пайдаланушы өзіне ыңғайлы уақытта теориялық және практикалық емтихандарға онлайн жазыла алады. Мемлекеттік баж төлемі емтиханды сәтті тапсырған соң ХҚО бөлімінде төленеді.
Қызмет еліміздің барлық өңірінде қолжетімді және 2026 жылдың 1 қыркүйегіне дейін пилоттық режимде жұмыс істейді.
Жаңа формат жүргізуші куәлігін алғаш рет алушылар үшін рәсімдеу процесін айтарлықтай жеңілдетіп, жылдам әрі ыңғайлы етті.
