4 желтоқсан, 2018
Мәскеуде "Локомотив" жастар командасының футболшысы Алексей Ломакин көз жұмды.
Жексенбі күні Борисовские Пруды көшесінен футболшының мәйіті табылды. Ойыншының денесінде зорлық-зомбылық белгілері болмаған. Қыркүйекте Алексей 18 жасқа толған. Құқық қорғау органдарындағы дереккөздің мәліметінше, футболшының анасы 3 желтоқсанға қараған түні полицияға жүгініпті.
Жақында Ломакиннің телефоны таксиден табылды, марқұм оны рюкзагымен бірге ұмытып кеткен. Көлікте ойыншымен бірге досы да болған. Жас жігіт көлікке отырар алдында Ломакин екеуі ішімдік ішкенін, әрі қарай не болғаны есінде жоқ екенін айтты.
Аталған трагедия "Локомотив" футболшыларын есеңгіретіп тастады. Жастар командасы Алексейдің отбасы мен жақындарына көңіл айтты. Ломакин мәскеулік клубтың академиясына 2007 жылы келген, Ресейдің жастар біріншілігінде команда үшін алты матчқа қатысты. Қараша айының басынан бері алған жарақатынан емделіп жүрген.
Дереккөз: Sputnik
