Қырғызстанда ата-анасы 20 жастағы қызын молдаға күштеп апарып, денесіне және психикасына ауыр жарақат келтіргені туралы оқиға жария болды, деп хабарлайды kznews.kz.
“Сезім” дағдарыс орталығының мәліметінше, Бішкек қаласының тұрғыны өз отбасында ұзақ уақыт бойы қорлық көрген.
Жас қыздың айтуынша, ата-анасының мұндай қатыгез әрекетіне оның хиджаб киюден бас тартуы себеп болған. Отбасы оны бірнеше рет молдаға апарып, “жын шығару” рәсімдерін жасатқан. Рәсім кезінде бойжеткен шлангпен ұрып-соғылған, сондай-ақ жағымсыз иісті сұйықтық құйылған бөшкеге күштеп батырылған.
Қыздың сөзінше, ата-анасы оның бостандығын да шектеген: телефонын тартып алып, үйден шығуға тыйым салған. Бойжеткен отбасының соңғы бір жылда радикалды діни көзқарастарға бет бұрғанын айтқан. Бұл жайт қоғамда үлкен резонанс тудырып, әлеуметтік желіде қызу талқылануда.
“Сезім” орталығының өкілдері ата-анасымен сөйлесіп, түсіндіру жұмыстарын жүргізгеннен кейін жағдайға белгілі бір өзгеріс енгізілген. Орталықтың мәліметінше, әңгімеден соң қызға хиджаб кимеуге рұқсат берілген.
