27 желтоқсан, 2025
Жаңа жыл қарсаңында мұғалімдерге жаппай сыйақы төлене ме деген сұраққа Оқу-ағарту министрлігі жауап берді, деп хабарлайды kznews.kz.
Министрліктің түсіндіруінше, мемлекеттік мерекелер алдында берілетін сыйақы әрбір білім беру ұйымының жылдық бюджетіндегі үнемделген қаражатқа тікелей байланысты. Қазіргі таңда білім беру саласында вертикальді басқару жүйесі қалыптасқан, яғни әр аудандық білім бөлімінің қаржысы дербес жоспарланады. Ел бойынша 8 мыңға жуық мектеп бар, ал 220 аудандық білім бөлімі осы оқу орындарының жылдық қаржылық есептерін қабылдап, жаңа жылға арналған бюджет көлемін бекітеді.
Оқу-ағарту министрлігі Орта білім беру комитетінің төрағасы Қаныбек Жұмашевтің айтуынша, басқару формасы өзгеріп, шаруашылық жүргізу құқығына ие болған мектептерде оң тәжірибе байқалады. Мұндай білім беру ұйымдарында мемлекеттік мерекелер қарсаңында педагогтерге белгілі бір мөлшерде сыйақы төленіп келеді.
«Сыйақылар тек мектеп бюджетінде үнемделген қаржы есебінен ғана беріледі», – деді комитет төрағасы.
