Бүгін, 10:16
Түркияның Ыстанбұл қаласында 26 жастағы Қазақстан азаматы Айсұлу Бекмаханова қайғылы жағдайда көз жұмды. Алдын ала мәлімет бойынша, бойжеткен алтыншы қабаттағы пәтердің балконынан көрші ғимараттың шатырына өтіп, кейін биіктен құлаған. Оның мұндай әрекетке не себепті барғаны әзірге белгісіз.
Ulysmedia.kz басылымының жазуынша, қайғылы оқиға 25 қазанда таңғы сағат 08:00 шамасында Ыстанбұлдың Шишли ауданындағы Эргенекон шағынауданында болған.
Түрік бұқаралық ақпарат құралдарының мәліметінше, 26 жастағы қазақстандық қыз алтыншы қабатта орналасқан пәтердің балконына шығып, белгісіз себеппен көрші ғимараттың шатырына өткен.
Бойжеткен шатырдың орта тұсына қарай жүрген. Алдын ала болжам бойынша, ол ғимараттың ашық кеңістігінің үстіне орнатылған жабынға аяқ басқан. Алайда конструкция оның салмағын көтере алмай, қыз төменге құлаған.
Қазақстандық бойжеткен ғимараттың минус екінші қабат деңгейіне дейін құлап, алған ауыр жарақаттарының салдарынан оқиға орнында көз жұмған.
Полиция оқиға орнынан не анықтады?
Оқиға туралы хабар түскеннен кейін аталған мекенжайға полиция қызметкерлері мен жедел жәрдем бригадасы жеткен.
Медицина қызметкерлері бойжеткенді тексергенімен, оның қайтыс болғанын анықтаған.
Түрік басылымдарының хабарлауынша, қайғылы жағдай кезінде қыздың үстінде киім толық болмаған. Оның неліктен мұндай жағдайда шатырға шыққаны әзірге анықталмаған.
Полиция оқиға орнын қарап, қажетті дәлелдемелерді жинаған. Кейін марқұмның денесі өлімнің нақты себебін анықтау үшін сот-медициналық сараптама институтына жеткізілді.
Қаза тапқан қазақстандық қыз туралы не белгілі?
Тергеу барысында марқұмның 26 жастағы Қазақстан азаматы Айсұлу Бекмаханова екені анықталған.
Түрік ақпарат құралдарының мәліметінше, бойжеткен 2026 жылдың қыркүйегінде Түркияға визасыз келу тәртібімен барған.
Алдын ала ақпарат бойынша, ол Ыстанбұлға Ресей азаматшасымен бірге келіп, екеуі бір пәтерде тұрған.
Қазіргі уақытта полиция қыздың оқиға алдында кімдермен байланысқаны және оның көрші ғимараттың шатырына не себепті өткені туралы мән-жайды анықтап жатыр.
