Кеңінен танылған "Прекрасное далеко" әнінің орындаушысы Татьяна Дасковская 80 жасқа қараған шағында қайтыс болды, деп хабарлайды kznews.kz.
Әншінің қазасының себептері мен мән-жайы хабарланбады. Ол Мәскеу облысындағы Домодедово қалалық округіне қарасты Заборьев зиратында жерленген.
Татьяна Дасковская 1946 жылғы 25 маусымда дүниеге келген. 1972-1996 жылдары КСРО-ның ірі киностудияларында – "Мосфильм" мен М. Горький атындағы киностудияда еңбек етіп, 200-ден астам фильмнің дыбысталуына қатысқан.
Ол кеңестік киноға арналған көптеген танымал әндерді орындады. Атап айтқанда, "Гостья из будущего" телефильміндегі "Прекрасное далеко", "Акванавты» әндері", "Одиноким предоставляется общежитие" картинасындағы "Осенние деньки", сондай-ақ "Десять лет без права переписки" фильміндегі барлық әндер оның орындауында шыққан. Бұдан бөлек, "Волк и семеро козлят на новый лад" мультфильміндегі Козаның дауысын сомдап, "Мама" рок-мюзикліне арналған әндерді де шырқаған.
1999 жылы Татьяна Дасковская Германияға қоныс аударып, онда "Гезанг" ("Поющие") театрында актриса ретінде өнер көрсетті.
