Бүгін, 11:13
Даркнетте Қазақстанның 15 млн тұрғынының жеке деректері сатылымға шығарылған. Бұл ел халқының шамамен төрттен үшіне тең. Бұл туралы Mash жазды, деп хабарлайды kznews.kz.
Басылым мәліметінше, shymzz13 деген лақап атпен тіркелген қолданушы файлды 0,5 биткоинге, яғни шамамен 32 мың долларға бағалаған. Сатушы деректер базасын мемлекеттік eGov сервисін бұзу арқылы алғанын мәлімдеген.
Көлемі 2,7 гигабайт болатын файлда шамамен 47 млн жол бар делінеді. Онда төлқұжат деректері, телефон нөмірлері, электронды пошта мекенжайлары, жұмыс орны туралы ақпарат, құжаттардың скан-көшірмелері және құпиясөздер болуы мүмкін.
eGov жүйесінде бұған дейін де қауіпсіздік мәселелері болған. Тамыздың басында кей қолданушылар жүйеге кірген кезде басқа азаматтардың жеке парақшалары ашылып кеткенін хабарлаған. Ал көктемде қазақстандық қаржыгер eGov арқылы компания тіркегеннен кейін бірнеше сағаттан соң жарнамалық қоңыраулар ала бастағанын айтқан.
Киберқауіпсіздік мамандары егер ақпараттың тарағаны расталса, деректердің алаяқтардың қолына түсіп, азаматтарға телефон арқылы шабуыл жасау үшін пайдаланылуы мүмкін екенін ескертеді.
Алайда базаның шынайылығы мен оның eGov жүйесін бұзу арқылы алынғаны әзірге ресми түрде расталған жоқ. Қазақстанның құзырлы органдары бұл ақпаратқа қатысты әзірге ресми мәлімдеме жасаған жоқ.
Айта кетейік, 11 тамызда Үкімет eGov порталының жаңартылған нұсқасы іске қосылғанын хабарлады.
